Concellos como Riotorto impiden usar no inverno as súas vías para actividade forestal, mentres noutros próximos non funciona esa limitación
15 feb 2024 . Actualizado ás 20:24 h.A actividade forestal pasa por unha certa hibernación. Algo así ocorre en municipios como Riotorto, onde a saca de madeira está prohibida no inverno en pistas municipais de terra. Noutros próximos —todos coinciden na presenza de importantes masas de monte—, pola contra, non existe esa limitación e os traballos poden estar condicionados polas circunstancias meteorolóxicas pero non por normativas do Concello.
No caso de Riotorto, o alcalde, Clemente Iglesias (PP), asegura que a postura está tomada para non danar as pistas que son de titularidade municipal. Explica que se se observa que algún empresario as está usando para sacar madeira, paralízanse os traballos e iníciase un expediente sancionador, tal como recolle a ordenanza reguladora.
O rexedor afirma que esa decisión se toma para facilitar que os veciños poidan usar esas pistas. Argumenta que se pasase por elas maquinaria forestal, quedarían moi danadas e de pouco servirían os traballos de hai meses, nos que se empregou unha motoniveladora para deixalas en boas condicións. Mentres tanto, apunta Iglesias , en vías do Concello riotortense que están asfaltadas ou aglomeradas si se están concedendo permisos para usalas no transporte de madeira sacada de montes.
Meses de espera
Fronte á medida oír voces críticas, especialmente de pequenos propietarios. Algúns argumentan que a decisión é un freo á actividade naquelas parroquias nas que o traballo no monte aínda mantén o pulso despois de que a agricultura e a gandería teñan desaparecido ou quedado en niveis moi reducidos. O que sostén algún propietario é que se crea un problema a quen teñen madeira apalabrada para vender, obrigados a agardar meses ata que o risco de deterioración invocada polo Concello desapareza.
Mentres tanto, en concellos próximos a Riotorto non se tomou ata agora unha medida dese tipo. Nin en Ribeira de Piquín, nin en Meira, nin na Pastoriza existe esa restrición, o que supón coincidencia á marxe de siglas: nos dous primeiros municipios goberna o PSOE, mentres que na Pastoriza hai alcalde do PP.
Castro de Rei chegou a reclamar no xulgado compensacións por deterioración da súa rede viaria
O Concello de Castro de Rei chegou a acudir á vía xudicial para esixir a reparación de pistas afectadas polo paso de maquinaria forestal. A finais do 2022, na parroquia de Orizón, apreciáronse danos nunha vía, polo que se contactou co maderista para que os reparase. A avaliación recollía danos valorados en 17.000 euros, pero o empresario rexeitou realizar eses traballos.
O alcalde, Francisco Balado, lembrou onte que entón se decidiu ir ao xulgado para esixir unha resposta, e condenouse ao empresario a pagar esa cantidade ou a arranxar a pista. O que fixo foi contratar os servizos dunha empresa, que se encargou de reparar a vía cun orzamento idéntico ao recolleito na valoración do Concello. Pasaron meses en todo o proceso, pero no 2023, dixo Balado, resolveuse o problema.
Non foi o único caso rexistrado neste municipio chairego. Nunha pista que une as parroquias de Balmonte e de Ramil rexistráronse danos, que se taxaron en 10.000 euros. Nese caso, no entanto, o empresario aceptou realizar traballos de mellora tras recibir a notificación do Concello. Esta vía era de terra, mentres que a de Orizón estaba asfaltada.
Nestes momentos, na parroquia de Goberno está a sacarse madeira con resultado de deterioración de pistas municipais. O Concello xa contactou coa empresa, que, recoñeceu Balado, comprometeuse a reparar os danos ao acabar os traballos.