O TSXG anula o requisito de ingresos mínimos nas axudas para autónomos
AGRICULTURA
Unións Agrarias recorrera as bases dun programa da Xunta
04 may 2024 . Actualizado ás 10:29 h.A sección terceira da Sala do Contencioso-Administrativo do Tribunal Superior de Xustiza de Galicia (TSXG) anulou os requisitos de rendementos netos mínimos correspondentes ao 2021 que debían de cumprir os autónomos, microempresas ou sociedades para poder optar ás axudas recollidas na orde do 28 de decembro do 2022 pola que se establecen as bases do programa Impacto Autónomo da Consellería de Promoción de Emprego e Igualdade e procédese á súa convocatoria para o 2023. Este limiar era de 10.000 euros para os autónomos e de 50.000 euros para o resto de entidades. Iso é o que recolle o fallo ditado o pasado 26 de abril por esta sala, tras ter admitido a trámite un recurso contencioso presentado por Unións Agrarias-UPA a principios de marzo do pasado ano contra a citada orde, dirixida a intentar minimizar o impacto da subida dos custos de materias primas e subministracións derivada do estalido da guerra de Ucraína na economía dos autónomos ou microempresas.
A organización agraria pedía a anulación dos apartados primeiro e terceiro do artigo 6.º da orde, nos que se establecían os rendementos netos mínimos que, tanto autónomos como microempresas ou sociedades con domicilio fiscal en Galicia, terían que ter tido no 2021 para poder acceder ás axudas deste programa. E xustificaba a demanda no feito de que aqueles autónomos con menores ingresos ou entidades de menor facturación quedaron excluídos destas subvencións, o que ao seu xuízo supuxo unha «discriminación inxustificada». Entendía, ademais, que «burla» o obxectivo da orde porque «non incorpora como posibles beneficiarios a quen acadan menores ingresos e menor facturación, quen serían, por outra banda, os que poderían resultar máis necesitados desta axuda».
Segundo os cálculos da organización agraria, no sector primario esa barreira de ingresos mínimos implicou deixar fóra á «inmensa maioría das explotacións de vacún de carne» e «case a metade das explotacións de leite en Galicia». Por iso é polo que, como engaden fontes de Unións Agrarias, «entre carne e leite, suporía deixar fóra a máis de 23.000 explotacións galegas, ás que habería que sumar as persoas autónomas e sociedades doutros subsectores que tamén padeceron o incremento dos custos enerxéticos, como o avícola, porcino, vitícola, hortícola...».
As cantidades
O importe das subvencións, dirixidas a todos os sectores produtivos, era de 800 euros para os autónomos que tributan por módulos. Para os que o fan en réxime de estimación directa ou atribución de renda, a cantidade ascendía a 1.200 euros en caso de ter rendementos netos de ata 30.000 euros, ou a 1.500 euros para aqueles con rendementos netos de ata 20.000 euros. No caso das microempresas as axudas foron de 1.200 euros para as que facturasen entre 250.000 e 750.000 euros ou de 1.500 euros para as que tivesen unha facturación de entre 50.000 e 250.000 euros.
A sentenza do TSXG tamén recolle a resposta da letrada da Xunta que alegou, entre outras cousas, que coa imposición dese mínimo de ingresos «non se vulnera o dereito á igualdade, xa que a orde responde a unha finalidade moi concreta: promover e fomentar a actividade de autónomos minimamente consolidados». A Administración explica ademais, segundo indica a sentenza, que foi necesario facer unha estimación dos autónomos potencialmente beneficiarios da axuda en relación cun nivel de rendemento de actividades económicas de contía suficiente para axudar a manter negocios realmente viables e sostibles no tempo, tendo en conta o desembolso de fondos públicos , de maneira que se decidiu crear un abano de facturación de entre 10.000 e 30.000 euros de rendementos.
O que non especifica a sentenza é como terá que executar a Xunta o fallo, que é recurrible. Porque, como di, «os órganos xurisdiccionais non poderán determinar a forma en que han de quedar redactados os preceptos dunha disposición xeral en substitución dos que anularen, nin poderán determinar o contido discrecional dos actos anulados». Desde Unións Agrarias, o seu portavoz, Félix Porto, cre que aínda que o fallo «será difícil de cumprir, pode sentar un precedente, ao deixar claro que unha convocatoria de axudas non pode ser excluínte».
Desde a Consellería de Emprego, Comercio e Emigración mostraron onte a súa «máximo respecto pola Xustiza e, nesa liña, estamos á espera de saber o alcance da sentenza da que vimos de ter coñecemento polos medios de comunicación». Neste sentido, engadiron que «unha vez recibida, os equipos xurídicos da Xunta analizarana, así como a eventual posibilidade de presentar recurso». Con todo, lembran que os requisitos «deste programa publicado a comezos de 2023 para compensar a autónomas e autónomos pola suba de custos en calquera sector, así como o procedemento a seguir, foran consensuados coas entidades máis representativas deste eido na Mesa do traballo autónomo de Galicia». Ademais, lembran que a Xunta destinase inicialmente «30 millones a a esta liña de apoios co obxectivo de chegar a unhas 25.000 persoas beneficiarias. Cómpre destacar que se procedeu a un aumento do crédito orzamentario ata en dúas ocasións, chegando a unha dotación»..