O Goberno obvia a subida de prezos na aprobación do plan contra o tabaco

O Consello de Ministros aprobou este martes o Plan Nacional de Prevención e Control do Tabaquismo 2024-2027 con «a idea de evitar que os mozos empecen a fumar, para axudar aos fumadores que queiran abandonar o hábito e para coidar o aire que todos e todas respiramos», tal como destaca o Ministerio de Sanidade. O departamento que encabeza Mónica García comprométese tamén a cambiar as leis —que é onde se agarda o verdadeiro impacto— antes de acabe a presente lexislatura. Concretamente, asegura que «gran parte das medidas» materializaranse coa modificación de Lei 28/2005 e o Real Decreto 579/2017, que son os que regulan o fundamental do que teñen que ver co consumo de tabaco en España.

O sentido no que van ir eses cambios é aínda unha incógnita, aínda que o que máis chama a atención é que nin sequera se mencione a subida de prezos, que formaba parte do plan presentado ás comunidades. A Asociación Española Contra o Cancro (AECC) non o pasou por alto e xa se dirixiu ao Ministerio de Facenda, de quen depende subir ou non os impostos, para recalcar a importancia das medidas fiscais. «España aínda ten marxe para aliñarse coas políticas fiscais europeas en materia de tabaco, onde os impostos máis elevados demostraron ser efectivos para reducir as taxas de consumo, especialmente entre os mozos», recalca a entidade.

O ministerio presenta o plan como o «froito dun traballo coordinado coa participación técnica de todas as comunidades, co maior dos consensos sociais e co respaldo das sociedades científicas». Pero o certo é que os gobernos autonómicos do PP, incluído o galego, por cálculo político ou polo que fose, non recibiron o documento con tanto entusiasmo. De feito hai medidas que algúns rexeitan, como a prohibición de fumar nas terrazas, que todo apunta a que vai ser un dos principais cabalos de batalla. Sanidade dá por feito que vai aumentar os espazos libres de fume para protexer o dereito a respirar», porque «canto máis espazo libre de fume, menos espazo ás enfermidades asociadas ao tabaquismo. Pero haberá que ver con que apoios conta cando haxa que sumar os votos necesarios no Parlamento.

O resto das medidas, en principio, debería ofrecer menos resistencia. A equiparación dos cigarros electrónicos e os produtos relacionados co tabaco tradicional é algo no que, salvo as tabaqueiras e algún grupo minoritario que defende o seu uso terapéutico, está todo o mundo de acordo. Impulsar a investigación é un obxectivo ao que ninguén vai dicir que non, como o de colaborar coas entidades locais para «impulsar o desenvolvemento de ordenanzas municipais de prohibición de guindar cabichas en vías públicas e espazos naturais». Outra cousa será someter iso a un control efectivo. E o de incorporar ás prestacións do Sistema Nacional de Saúde aqueles medicamentos que «son adecuados para o tratamento da adicción ao tabaco» dáse por sentado. Onde poden aparecer friccións é cando haxa que ver quen os paga.

---

---

---