Agárdase un progresivo aumento das temperaturas que se sentirá en toda a comunidade
09 abr 2024 . Actualizado ás 05:00 h.Despois de dous meses moi chuviosos en Galicia, por fin chega a tregua. Durante o inverno houbo algún episodio de tempo seco e mesmo con altas temperaturas, pero foron moi breves. Isto foi así basicamente polo anticiclón dos Azores, que non parou quedo en febreiro e marzo. Con todo, ao longo da próxima semana manterase practicamente estacionario ao norte da Península. É dicir, permanecerá quedo na mesma posición. E en todo caso, o lixeiro movemento que poida facer tampouco terá efectos negativos.
Tras a xornada de onte con ballóns e neve a partir dos 1.200 metros, este martes agárdase xa unha melloraría progresiva. Pola mañá, aínda quedará algo do aire frío de orixe polar que provocou que descendesen as temperaturas de xeito notable. Non se descartan algúns chuvascos.
Mañá, o anticiclón ascenderá cara ao norte ata situarse xusto sobre a Península. Esta configuración permitirá que os seus ventos canalicen aire cálido desde o sur. Será un día con nubes e claros e cun incremento notable das temperaturas. Entre onte e mañá, as máximas en Ourense ascenderán 10 graos.
O xoves, o centro do anticiclón estará situado ao oeste da bretaña francesa. O vento soprará do sueste e, como consecuencia, vaise producir un novo e notable ascenso térmico, especialmente na costa norte. A previsión de Meteogalicia anuncia valores de 26 graos en Ferrol. No resto da comunidade superaranse os 23. Ademais, o vento soprará frouxo permitindo que a sensación térmica sexa practicamente estival.
O venres, o sistema anticiclónico moverase lixeiramente cara ao leste ata situar o centro sobre o interior de Francia. Desde aí seguirá enviando aire cálido de orixe subtropical cara ao noroeste peninsular. As temperaturas serán elevadas para a época do ano de xeito xeneralizado. Incluso as mínimas marcarán cifras altas, con rexistros por amais de 16 graos. É dicir, nalgunhas zonas, a máxima de onte será a mínima na xornada do venres.
A fin de semana está practicamente garantido o abrazo anticiclónico. O único matiz o o vento do norte que podería xerar un importante contraste entre a costa da Coruña e de Lugo e o resto da comunidade galega. No sur seguirá o tempo asollado e cálido.