Esta fin de semana agárdanse en boa parte da Península temperaturas por amais de 30 graos
05 abr 2024 . Actualizado ás 22:13 h.Tal e como estaba previsto, a borrasca Olivia nomeada pola Aemet deixou en Galicia ventos fortes do sur que impulsaron unha masa de aire cálido que elevou as máximas. Ademais, xusto como adoita ocorrer neste tipo de configuración, algúns dos valores máis altos rexistráronse na costa de Lugo. O termómetro este venres en Ribadeo ascendeu ata 26,3 graos.
Esta fin de semana, a situación atmosférica é moi parecida, aínda que cun lixeiro matiz que ten notables implicacións. Ao oeste da costa galega atópase a borrasca Kathleen, bautizada pola Axencia Meteorolóxica do Reino Unido (Met Office), onde este profundo sistema de baixas presións deixará un temporal de vento.
Xusto como ocorreu co caso Olivia, o ciclón extratropical arrastra consigo aire de orixe subtropical. A masa de aire cálido non só invadirá toda a Península, senón boa parte de Europa e chegará mesmo ata o Reino Unido. A Met Office explica nunha publicación da súa conta de Twitter que esta fin de semana poderían darse as temperaturas máis altas do ano.
Con todo, nesta ocasión, Galicia e o norte Portugal quedarán xusto no límite entre o aire africano e o atlántico. O vento soprará do sur, pero tamén de compoñente oeste e isto provocará que o noroeste peninsular permaneza á marxe das temperaturas tan altas que se agardan para os próximos días. A Aemet recoñece que as máximas no sur de España poderían ascender polo menos ata os 32 graos esta fin de semana. Tamén está prevista a chegada de po en suspensión que dará lugar a un episodio de calima..
Este sábado en Galicia, tras o paso da fronte asociada a Kathleen durante a madrugada, prevese unha xornada con ballóns que serán máis frecuentes pola mañá e ocasionais pola tarde. As temperaturas subirán como moito ata os 19 graos.
O domingo será un día de transición á espera de que chegue unha nova borrasca durante a madrugada do luns. O ceo alternará nubes e grandes claros e o termómetro non experimentará grandes cambios. De novo, a comunidade galega estará á marxe da calor africana que afectará o resto de España e que propiciará valores altos para a época do ano.
O luns chegará aire frío desde o norte que provocará un importante descenso das máximas e as mínimas, ballóns e mesmo neve a partir de 1.200 metros de altura. Completarase así unha auténtica montaña rusa térmica.
A partir do martes o anticiclón dos Azores, que leva unhas semanas mantendo un perfil baixo, empeza a ocupar máis espazo e a elevar a súa presión central. A súa influencia conseguirá cortar a circulación de borrascas. Parece que o fará ata o domingo 14. Salvo sorpresa maiúscula a semana que vén imporase con claridade o tempo seco.