Agárdanse máximas entre hoxe e mañá de polo menos 23 graos en toda a comunidade galega
04 abr 2024 . Actualizado ás 05:00 h.Nas próximas horas a atmosfera ofrecerá un novo caso que demostra ata que punto os efectos dun determinado sistema meteorolóxico en Galicia non só dependen directamente da súa posición, senón tamén da localización doutros.
A semana pasada, unha única borrasca, nomeada como Nelson pola Aemet, augou as vacacións a todos os galegos. Era un sistema de baixas presións de tipo estacionario. É dicir, non se moveu da súa posición ao sur de Irlanda durante varios días consecutivos. Desde aí enviou as frontes que regaron a comunidade e o resto da Península. Ademais, tamén canalizou aire frío desde o extremo norte do Atlántico que propiciou un ambiente xélido e neve a partir de 1.000 metros.
Esta semana un novo tren de borrascas cruza o océano. Entre hoxe e mañá una delas vaise a situar ao noroeste dos Azores. O servizo meteorolóxico de Portugal bautizouna como Olivia. Onte, Galicia xa empezou a notarse os seus efectos a través dun ascenso térmico. As máximas ascenderon ata os 21,7 graos na localidade pontevedresa de Marín. Con todo, o vento soprou do suroeste. Esa compoñente oeste, que trae aire do Atlántico, impediu que as temperaturas fosen mesmo máis altas.
Pero nas próximas 48 horas, Olivia vaise situar ao noroeste da costa galega e ademais hai que sumar a esta ecuación ao anticiclón. Está sobre o Mediterráneo cunha presión discreta, aínda que neste caso resulta intranscendente.
Desde esa localización axudará á borrasca a crear un corredor de ventos do sur que transportan aire cálido. Hoxe, as máximas xa chegarán ata os 23 graos en Ourense e oscilarán entre 18 e 20 graos no resto da comunidade.
Mañá, eses ventos do sur, que soprarán fortes, promoverán un novo e xeneralizado ascenso térmico. Os galegos poderán gozar por unhas horas dun ambiente primaveral moi agradable e mesmo caloroso. En Vigo e A Coruña agárdanse valores diúrnos de polo menos 23 graos e algúns máis na provincia ourensá. Como adoita ser habitual cando coinciden aire cálido e ventos do sur, o ascenso máis notable agárdase na costa de Lugo.
Iso si, xa pola noite, o mesmo sistema de baixas presións enviará unha fronte e, ademais, o vento do sur volverá recuperar a compoñente oeste. Como consecuencia, as temperaturas descenderán lixeiramente. O sábado, o termómetro ascenderá como moito ata 18 graos. Ademais, será un día de chuvascos, aínda que tamén haberá momentos sen precipitacións. O domingo será unha xornada máis seca. Os modelos empezan a coincidir en que a mediados da próxima semana o anticiclón podería empezar a imporse con contundencia.