Este sábado hai avisos por choivas intensas e espesores de neve que poden acadar os dez centímetros
01 mares 2024 . Actualizado ás 15:46 h.Galicia atópase actualmente baixo a influencia dunha profunda borrasca situada sobre Irlanda. As choivas están a ser persistentes durante a primeira metade do día, pero pola tarde caerán de xeito ocasional. A cota de neve rematará a xornada ao redor de 1.200 metros.
Mañá, o anticiclón localizado ao oeste da Península e unha borrasca que se vai situar ao sur do Reino Unido crean un corredor perfecto a través do cal chega aire directamente desde o Ártico a Galicia. Durante a primeira metade da xornada, a fronte que vén da man do sistema de baixas presións varrerá a comunidade de oeste a leste. Agárdase que sexa bastante activo. A Aemet activou un aviso no noroeste e interior da Coruña e tamén a provincia de Pontevedra por acumulacións de auga de ata 40 litros por metro cadrado en 12 horas.
Tras o paso da fronte, como adoita ser habitual, chegará o frío polar. Unha vez máis, a masa de aire é polar marítima: xélida e húmida. As choivas serán de carácter intermitente, ocasionalmente fortes, acompañadas de saraiba e aparello eléctrico. Por amais dos 700 metros, caerá en forma de neve. A Axencia Estatal de Meteoroloxía tamén activou un aviso amarelo nas montañas de Lugo e Ourense por acumulacións de neve de dez centímetros. A cota podería descender nalgúns momentos mesmo ata os 600 metros.
O termómetro tamén sentirá os efectos do aire polar. Está previsto un descenso das máximas e as mínimas. En moitos puntos da comunidade, quedarán por baixo dos dez graos. Ademais, o vento soprará intenso do noroeste, aumentando a sensación de frío.
O domingo, Galicia permanecerá aínda baixo a influencia das baixas presións con réxime de ventos de compoñente oeste. O ceo seguirá presentando moita nebulosidade de tipo baixa e as precipitacións, máis probables, pola mañá, presentaranse en forma de neve a partir dos 800 metros de altura. As temperaturas mínimas quedarán sen cambios significativos e as máximas experimentarán un lixeiro ascenso. O vento soprará moderado de compoñente oeste.
Segundo confirma Meteogalicia, o luns non se agardan cambios significativos xa que a comunidade seguirá percibindo os efectos das borrascas que circulan preto da Península. Haberá choivas máis intensas pola mañá que irán remitindo co avance da tarde. As temperaturas mínimas experimentarán un lixeiro ascenso mentres que as máximas quedarán sen cambios significativos. O vento soprará moderado de compoñente oeste, con intervalos fortes no litoral norte.