As canles estándar desaparecerán o 14 de febreiro tras unha moratoria dun ano
10 feb 2024 . Actualizado ás 16:37 h.Un total de 4.300 fogares de Galicia situados na chamada «zona de sombra» da TDT veranse afectados polo apagado das canles de televisión que emiten en calidade estándar (SD) e que está previsto para o próximo día 14 de febreiro. Estas vivendas, dispersas en ata 260 concellos da comunidade, reciben o sinal de televisión a través de satélite con equipos que, en moitos casos, non son compatibles coa alta definición (HD), a única modalidade na que poderán emitir as canles a partir de agora.
A Xunta aprobou este xoves no Consello axudas para adaptar estes receptores de satélite, cuxo custo pode chegar a 400 euros. As subvencións terán carácter retroactivo e poderán chegar ao 100 % do custo do aparello no caso de que se trate dunha primeira vivenda e ata o 50 % do importe se se trata dunha segunda residencia, nese caso o tope da axuda situaríase en 200 euros.
O Goberno da Xunta comunicou este xoves que hai dous meses, en decembro do 2023, «trasladou por carta ao Goberno central a súa preocupación pola situación que ían vivir os galegos que residen en zonas de sombra a raíz do apagón previsto para este mes de febreiro». Alfonso Rueda considerou que estas axudas deberían ser aplicadas polo Goberno central. Nos últimos días, a alcaldesa do Concello lucense de Folgoso do Courel (PP) pediu tamén unha moratoria no apagamento da TDT que afectará os seus veciños.
En marzo do 2019, o Plan Técnico Nacional da Televisión Dixital Terrestre, que regula a liberación do espazo radioeléctrico, fixou o 1 de xaneiro do 2023 como data límite para a transición de todas as emisións de televisión a alta definición. Desde entón, as principais canles de televisión xeneralista estiveron emitindo en simulcast dous sinais, unha en SD e outra en HD. A primeira, de baixa definición, é a que desaparecerá dentro duns días.
En xaneiro do ano pasado, o Goberno central modificou o plan técnico e deu unha moratoria dun ano para dar un tempo extra para adaptar os equipos. Fixou o 14 de febreiro do 2024 para o apagamento definitivo das canles estándar. A ampliación, segundo explicouse entón desde Moncloa, respondía «a unha situación excepcional derivada da pandemia, que retardou a renovación do parque de aparellos de televisión».
Máis aló dos fogares de zonas rurais que reciben a televisión satélite mediante receptores que precisan unha actualización, o resto das vivendas non experimentarán problemas para ver a televisión máis aló da desaparición as canles SD e a necesidade de resintonizar e reordenar canles para poder manter as preferencias persoais na numeración do mando.
«A renovación de televisores é bastante grande e a maioría dos comprados nos últimos anos teñen o sistema HD incorporado», explica José Luis Lamoso, da empresa de instalación de telecomunicacións Isatel.
O impacto podería notarse naqueles fogares que conserven algún televisor de tubo ou unha pantalla plana antiga, non adaptada ao HD, nese caso necesitarían conectarse a un descodificador de TDT que sexa compatible coa alta definición.
RTVE anunciou que adiantaba o apagado das súas canles SD ao pasado martes. TVG e TVG2 farano o 12 de febreiro, segundo informa a oficina da TDT en Galicia, e o resto das cadeas, o día 14.