Google cambia o nome da súa intelixencia artificial IA a Gemini e lanza a súa aplicación móbil
SOCIEDADE
A ferramenta lanza unha subscrición prémium por 19,99 euros ao mes
08 feb 2024 . Actualizado ás 18:25 h.Google cambiou o nome do seu chatbot con intelixencia artificial (IA) de Bard a Gemini e anunciou que a partir de hoxe esta tecnoloxía estará dispoñible nunha nova aplicación Gemini para Android e a través da aplicación de Google en iOS. Ademais, lanzou unha versión «avanzada» de pagamento.
Pouco despois da popularidade de ChatGPT, de Open IA, Google lanzou a principios do 2023 o seu chatbot Bard e a finais de ano anunciou o seu modelo multimodal Gemini.
A vicepresidenta e directora xeral de experiencias Gemini e o asistente de Google, Sissie Hsiao, contaron nunha rolda de prensa que, máis aló do cambio de nome e logotipo, o chatbot —que está potenciado polo modelo de linguaxe (LLM) Gemini Pro e está dispoñible a nivel global en 40 linguas—, é o mesmo.
«A autoconciencia é algo complicado para os modelos, polo que se o xoves se lle pregunta (a Gemini) ‘‘Como che chamas?'' quizais responda: ‘‘Son Bard''», anotou Hsiao.
Google tamén lanza nos Estados Unidos a aplicación móbil Gemini para Android e o acceso a Gemini desde a aplicación de Google en iOS, nas que os usuarios poden escribir, falar e compartir imaxes co chatbot.
«É un primeiro paso moi importante cara á creación dun verdadeiro asistente de IA», recalcou Hsiao e explicou que os usuarios poden tomar unha foto a unha roda picada e que Gemini responderalles cun tutorial, paso a paso, de como cambiala.
No caso dos teléfonos Android, Gemini pode converterse no asistente principal do teléfono, en tanto que os usuarios poderán activalo co botón central do seu teléfono ou dicindo: «Hey Google» ou «Ok Google».
A partir da próxima semana, Google lanzará o acceso a Gemini por aplicación en toda a rexión de Asia-Pacífico en inglés, xaponés e coreano e pronto estará dispoñible en máis países e idiomas, entre eles o español.
Gemini Advanced, a versión de pagamento de Gemini
Outro lanzamento de Google deste xoves en 150 países é Gemini Advanced, onde o chatbot ten acceso ao LLM Ultra 1.0 e é capaz de responder —por agora só en inglés— a tarefas máis complexas, como a programación, o razoamento lóxico ou a colaboración creativa.
«Gemini Advanced non só lle permite escribir indicacións máis longas, senón que tamén pode comprender mellor o contexto das súas indicacións anteriores», explica Hsiao.
A subscrición para acceder a Gemini Advanced custará 19,99 ao mes e tamén dá acceso ao paquete prémiun de Google One e os seus 2 terabytes de almacenamento en Google. «Estamos entusiasmados de que a xente comece a probar Gemini Advanced. Así que temos unha proba de dous meses sen custo que estará dispoñible o xoves», anunciou Shimrit Ben-Yair, vicepresidenta de Google Photos e Google One.
Ademais, a compaña anunciou que está a traballar para que «pronto» os usuarios de Google One AI Premium poidan usar Gemini en Gmail, Docs, Sheets, Slides e Meet.
Con estes anuncios, Google intenta demostrar que segue na carreira por converterse na empresa de referencia no relativo aos chatbots, pelexa na que tamén participan outros pesos pesados como OpenAI e Microsoft, que tamén ofrece unha subscrición para usar a IA nas súas aplicacións de Microsoft 365.