A azarosa vida sentimental da «princesa rebelde» estivo moi vinculada ao circo
01 feb 2024 . Actualizado ás 20:03 h.Unha morte que marcou a súa vida, unha infidelidade pública e o amor ao circo. Esas son os tres fitos que poderían resumir ben a vida da princesa Estefanía de Mónaco , que hoxe cumpre 59 anos. Aos 16 anos, a máis pequena dos fillos do príncipe Rainiero e Grace Kelly sufriu un gravísimo accidente de coche coa súa nai, na que ela quedou gravemente ferida e a actriz morreu. Sobre ese suceso sempre voou un halo de misterio, xa que moitos aseguraban que era realmente Estefanía a que conducía e non a súa nai. Poucas veces falou diso, só en contadas ocasións. «Non só tiven que pasar polo horrible trauma de perder á miña nai a unha idade moi nova, senón tamén estar ao seu lado no momento do accidente. Ninguén pode imaxinar o moito que sufrín e sigo sufrindo», aseguraba nunha entrevista en París Match no ano 2002.
Alcumada como a princesa «rebelde» polo seu carácter díscolo e un tanto difícil, segundo transcendeu, a súa azarosa vida sentimental profundou aínda máis nese perfil público. Quixo ser deseñadora, e o foi, e ata se atreveu a cantar sacando ao mercado varios discos. Do seu matrimonio co seu gardacostas, Daniel Ducruet, naceron os seus fillos Louis e Pauline. Pero a súa relación rematou abruptamente cando se publicaron unhas explícitas fotografías de Ducruet mantendo relacións sexuais con outra muller. Uns anos despois naceu Camille, tras unha relación con outro dos seus gardacostas, Jean Raymond Gottlieb.
Tamén foron moi soadas as súas relacións con xente do mundo do circo. casou co portugués Adans Peres e anos máis tarde percorreu Europa xunto ao domador de elefantes Franco Knie, vivindo cos seus tres fillos nunha caravana. «Vivín varias vidas nunha. Gústame a vida con todo o que me achega e aproveito cada instante. Acabe ben ou mal... Sen pesares», declarou fai uns anos nunha televisión francesa. Unha das súas paixóns é o circo, precisamente. A princesa Estefanía púidose ver subida a elefantes, e na actualidade é presidenta do Festival Internacional de Circo de Montecarlo, mostrando sempre o seu apoio a este espectáculo.
Agora, aos 59 anos, soprou as veas debutando nun novo papel, o de avoa, xa que o seu fillos Louis se estreou como pai hai apenas uns meses.