A lotería agraciou ao Grove con 56 millóns de euros que poden ter voado en gran parte cos turistas

A fortuna aterrou onte no Grove, confirmando as sensacións que albergaba nos últimos meses o loteiro Manuel Rodríguez, da Centola Dourada de Moreno. Sabía que a sorte o salpicaría en Nadal, pero talvez nunca pensou que con tantos millóns. Rodríguez vendeu na súa administración nada menos que 45 series do 58303, o número que foi agraciado co segundo premio. En total 56.250.000 euros, unha cantidade que probablemente estea repartida entre turistas e veciños, xa que trinta desas series foron vendidas no mes de xullo: «A xente de aquí non adoita mercar aínda nesas datas». «Aquí a xente vén comprar a de Nadal en novembro e decembro», engadía.

Rodríguez non daba crédito. Mirou varias veces os papeis para confirmar que era certo e mesmo comprobar cando se despacharon os billetes. Algúns deles, en setembro. Nun primeiro momento, pensaron que o número llo levou unha pena, desas que adoitan apostar máis veces ao ano, o que aumentaba as posibilidades de que fose máis repartido, cousa que ao final non sucedeu. Os décimos foran vendidos en portelo.

Algún veciño dos que se achegaron á administración ante a xolda reinante confesou que ese número era dos que lle ofreceu o loteiro para xogar co seu grupo de amigos, pero que, ante a indecisión, finalmente quedou con outro. «Mira, téñoo aquí no grupo de WhatsApp», comentaba o home. Unha mágoa. De feito, había certa esperanza de que tocase nalgún club ou asociación de nais e pais de alumnos.

Quen si apareceu por alí foi unha veciña agraciada con dous décimos, residente en Vilalonga, que contaba que destinaría o bo belisco ao pagamento da hipoteca dun dos seus fillos. Era Angélica Casal, que se emocionaba porque había ir ao pobo traída por unha mala noticia que afectaba a un familiar. Talvez por iso, lonxe de deixarse levar pola euforia, atendía aos medios entre bágoas. Os loteiros, Manuel e a súa empregada, Maica, abrazárona efusivamente, mentres agardaban a que algún outro afortunado se pasase polas instalacións. Con todo, a alegría de repartir sorte é para eles máis que suficiente.

A Centola Dourada está de sorte. Este ano repartiu pequenos beliscos na bonoloto e na primitiva. Xa no 2019 colocou un terceiro premio da lotería de Nadal, o 00750, e no 2020, algún décimo do gordo, o 72897, pero nunca a choiva de millóns fora tan grande. «Estou pletórico, alucinando», recoñecía Rodríguez, á vez que recibía felicitacións de quen entraban pola porta e o teléfono non deixaba de soar. A súa muller explicaba que desde que lle puxeron o nome á administración «parece que atrae máis á sorte».

O cava xa se había descorchado unha hora antes, pois A Centola Dourada vendeu tamén un décimo do 37038, un dos quintos. «Ese foi un billete de intercambio coa administración de Riotorto que vendeu a serie completa, e cedéunolo porque agora temos a posibilidade de fraccionar os billetes», explicaba. Aínda que o afortunado non apareceu por alí, no local brindouse igual, que todo premio é unha alegría. Ata as súas veciñas da panadería Castros saltaban de felicidade. Rodríguez calcula que esta dose de emoción aumentará as vendas de cara á lotería do Neno, que xa van a bo ritmo, e animará a máis compradores a apostar pola administración á hora de depositar as súas ilusións. A maior número de décimos, maior probabilidade de que a fortuna se presente.

Na cafetería Habaneiro selouse na máquina outro quinto, o 88979, outros 6.000 euros, pero o agraciado tampouco fixo acto de presenza no bar.

---

---

---