Televisión de Galicia emite a partir das 22.30 horas o último documental da temporada
02 feb 2021 . Actualizado ás 19:22 h.O longo das últimas semanas, Na mente do asasino, producido por Voz Audiovisual, abordou 14 crimes moi diversos acontecidos en Galicia e que foron resoltos, pero no episodio desta noite centrarase nun que non o está, o crime sen resolver de Deborah Fernández.
O 10 de maio do 2002 unha veciña da parroquia de Portocelo en Oia atopou nunha cuneta o corpo sen vida de Deborah Fernández, unha moza de 22 anos que saíra correr pola praia de Samil. Pasaran dez días desde a súa desaparición e van xa máis de 6.500 sen que a súa familia obtivera unha resposta.
A investigación policial e a xudicial segue aberta.
Coas intervencións de Jorge Sobral, catedrático de psicoloxía criminal; Marta Fontán, xornalista; Ramón e Nacho Pérez Amoedo, avogados; Rosa e José Fernández-Carrera, irmáns de Deborah; e Marta Olivares, profesora de vítima, Na mente do asasino profundará no caso e nos detalles dos feitos.
No debate posterior en plató, o xornalista Pablo Carballo estará acompañado por diversos expertos de diferentes ámbitos para analizar as causas que poden levar a que un homicidio non chegue a resolverse. Luis Alamancos, criminólogo; Ana Sacau, psicóloga criminal; Ignacio Santaló, avogado penalista; e Manuel Fernández Blanco, psicoanalista e psicólogo clínico, participarán no coloquio.
Na mente do asasino é unha serie de quince documentais, acompañado doutras tantas mesas de debate posteriores presentadas que afondan nos impulsos e pensamentos das persoas que cometeron algúns dos crimes galegos máis impactantes dos últimos tempos.
