Feijoo asume a necesidade de mellora e quere reducir a xestión de 16 a 3 meses
21 jul 2017 . Actualizado ás 05:00 h.«Hai procesos que necesitan mellorar e estar a altura dos galegos, e co recoñecemento da discapacidade temos que ser máis áxiles, non ten a rapidez que debería ter». O presidente Feijoo entoou o mea culpa antes de anunciar que o seu Goberno se propuxo o «ambicioso obxectivo» de rebaixar de 16 meses a 3 o tempo de tramitación para establecer o grao de discapacidade dunha persoa.
Para iso, a Consellería de Política Social vai contar coa colaboración adicional do persoal médico vinculado ao departamento de Sanidade e ao Sergas. Trátase de voluntarios que van cobrar unha gratificación nas súas nóminas, de maneira que se poidan acadar unhas 1.500 valoracións ao mes, iniciativa que terá un custo de 360.000 euros para este exercicio e o próximo.
Ao acordo súmase tamén a Axencia para a Modernización Tecnolóxica de Galicia, que posibilitará tecnicamente que os médicos do Sergas que vaian participar nas valoracións e os que xa están facendo ese labor poidan acceder aos datos da historia clínica a través da aplicación informática Ianus. Nesta plataforma figurarán todos os informes médicos que sustentan e xustifican a posible situación de discapacidade alegada polo solicitante.
A idea do Goberno galego é eliminar canto antes a bolsa de expedientes pendentes e estabilizar o tempo máximo de resposta nos noventa días, para o que se habilitan os recursos humanos sanitarios citados -«bastantes xa», segundo Feijoo- e mellóranse os medios técnicos, tanto para o persoal encargado dos trámites como para os usuarios, para reducir así os desprazamentos innecesarios e fomentar a interactuación coa Administración. Por exemplo, non será necesario presentar os informes de saúde que xa figuran no ámbito do sistema público de saúde, nin tampouco haberá que asistir salvo excepcións ás oficinas das seccións de valoración.
Nos dous últimos anos tamén se reforzaron os equipos de valoración e orientación (EVO) en Santiago, Pontevedra e Vigo, e fíxose unha redistribución das áreas xeográficas de atención na provincia da Coruña. Isto propiciou unha reasignación dos concellos vinculados aos centros de Santiago e Ferrol, reducindo os desprazamentos dos solicitantes.
Reforzos se é necesario
Antes de que acabe este ano, a Xunta ten previsto facer unha primeira valoración do sistema que agora se pon en marcha por se fose necesario adoptar novas medidas de reforzo que consistirían na ampliación económica da partida para incorporar a máis médicos ao proxecto ata que se acaden todos os obxectivos.
Na actualidade, a Administración autonómica paga algunha prestación a preto de 49.000 dependentes galegos, o que supón un 73 % dos solicitantes. O obxectivo é acadar as 60.000 persoas esta lexislatura.
Cruz Vermella faise cargo do transporte adaptado para 52 estudantes galegos
A Consellería de Educación e Cruz Vermella Española facilitarán o próximo curso o transporte adaptado a 52 alumnos con discapacidades. Para iso, o Goberno galego, que na súa reunión semanal deu o visto e prace ao convenio, habilita unha partida de 180.000 euros para financiar o importe dos desprazamentos de ida e volta desde os seus domicilios aos colexios, así como aos centros de rehabilitación cando a cita coincida en horario escolar. O servizo, do que a Xunta se fai cargo do 80 % do custo, adaptarase ás necesidades horarias dos alumnos, moitas veces condicionadas polo tratamento. Nos vehículos poderán viaxar os doce coidadores que acompañan a aquelas persoas que necesitan atención individualizada, continua e permanente.