Antonio Roma, que destacou no caso do roubo do Códice Calixtino, será o novo fiscal xefe en Santiago
SANTIAGO CIDADE
O fiscal xeral do Estado, Álvaro García Ortiz, propuxo no pleno do Consello Fiscal a Antonio Roma Valdés como novo fiscal xefe da Fiscalía compostelá, en substitución de Mario Piñeiro, que desempeñou o cargo ata agora.
Roma incorporouse á carreira fiscal en 1994, xa na Fiscalía de Santiago, e destacou especialmente —entre outros asuntos— polo seu traballo como acusación pública no caso do roubo do Códice Calixtino, no que logrou unha dura condena para o acusado, o exelectricista da Catedral Manuel Fernández Castiñeiras.
Entre o 2017 e o 2022 pasou a servizos especiais para integrarse no programa PAcCTO, financiado pola Unión Europea para contribuír á seguridade e a xustiza en América Latina a través do apoio á loita contra o crime transnacional organizado. Neste destino estivo ata xaneiro do 2023, cando se reincorporou á Fiscalía compostelá.
O novo fiscal xefe da área de Santiago foi ademais vocal do Consello Fiscal entre os anos 2014 e 2017 e exerceu como especialista en cooperación internacional, delincuencia contra o patrimonio cultural e delitos informáticos.
Dáse a circunstancia de que Antonio Roma foi ademais compañeiro do actual fiscal xeral do Estado, Álvaro García Ortiz, xa que este último estivo tamén destinado en Santiago, polo que coñece á perfección a súa capacidade de traballo.