Espiña e Delfín presenta un novo proxecto á segunda convocatoria do Perte do ciclo urbano da auga

Espiña e Delfín presentou o seu novo proxecto de dixitalización do ciclo urbano da auga á segunda convocatoria de subvencións no marco do Plan de Recuperación, Transformación e Resiliencia (Perte). Con 9,5 millóns de euros de orzamento, son 34 actuacións para dixitalizar e optimizar o ciclo integral da auga en nove municipios galegos: Ordes, Melide, Boqueixón, Mesía, Curtis, Sanxenxo, A Illa de Arousa, Vilalba e Burela. A poboación conxunta nestes municipios, no que xestiona a auga a empresa santiaguesa, alcanza os 76.798 habitantes.

As actuacións divídense en tres tipos. As primeiras céntranse no estudo previo para coñecer en profundidade o ciclo da auga en cada municipio, para despois poder despregar tecnoloxías como a intelixencia artificial e os xemelgos dixitais. O seguinte grupo de accións enfócase na instalación de sensores e dispositivos intelixentes que proporcionen datos en tempo real sobre o consumo, a calidade e outros parámetros da auga. O último apartado está dedicado ao desenvolvemento de plataformas e aplicacións, así como á ciberseguridade para recompilar e procesar grandes volumes de datos.

Todas estas actuacións permitirán a Espiña e Delfín mellorar o estado das masas de auga, optimizar a distribución e diminuír as perdas hídricas durante o seu transporte. En concreto, «este proxecto axudará a unha xestión máis eficiente e óptima da auga en cada municipio e proporcionará datos en tempo real sobre o consumo e a calidade da auga». En outubro, o Ministerio para a Transición Ecolóxica e Reto Demográfico xa outorgara á compañía galega unha axuda de 7 millóns de euros, para a dixitalización do ciclo urbano da auga en Cartelle, Cerceda, Coirós, Leiro, Negreira, Palas de Rei, Sarria, Vilagarcía e Vilanova de Arousa, na primeira convocatoria do Perte de dixitalización da auga.

---

---

---