A baixa do veterano cérbero de 39 anos de idade é a primeira medida que adoptan dirixentes e técnicos do club tras a decepcionante tempada
09 may 2024 . Actualizado á 13:08 h.Antes de concluír a tempada, e cando aínda había opcións de clasificarse para o play off, os mandatarios do Compostela puxeron a primeira pedra do novo proxecto. Coa renovación de Antón Permuy e Dani Gesto na banda de San Lázaro empezou a traballarse no futuro do equipo, que volverá intentar o cambio de categoría tras o fracaso deste curso. Nada máis confirmarse o fin da tempada, sen lograr meterse na promoción, os movementos xa comezaron na zona nobre das oficinas do club.
Un dos ilustres, dos eternos protagonistas das tempadas máis recentes, o veterano porteiro uruguaio Pato Guillén (Montevideo, Uruguai, 1984), despídese da entidade branquiazul. Xogou o seu último partido como compostelanista na cidade deportiva Nando Yosu de Santander ante o Raio Cantabria. Encaixou os seus tres últimos goles coa zamarra do Compos.
Xogou no equipo da capital galega durante seis tempadas, disputando un total de 177 encontros. O meta uruguaio e o Compostela separan os seus camiños despois de seis cursos xuntos, os cinco últimos de xeito consecutivo. Pato Guillén deixa o recordo de paradas antolóxicas e a marca de imbatibilidade ao contabilizar 798 minutos sen encaixar un gol no 2020. Tamén se vai coa segundo mellor marca no seu poder, tras 704 minutos sen ver perforada a súa portería no 2023. Converteuse por méritos propios nunha parte moi viva da historia do club.
Na súa despedida, o Compos «só ten palabras de agradecemento por todo o que achegou nestas campañas xuntos», desexándolle «moita sorte para o futuro, no deportivo e no persoal». Na nota oficial, o Compostela lémbralle que «esta sempre será a súa casa».