O pivote ucraíno do Obradoiro é o xogador que máis tapóns fai, por diante do madridista, e é o que máis faltas recibe na Liga Endesa
01 abr 2024 . Actualizado ás 20:10 h.«É moito máis difícil ter en fronte todos os días a Artem Pustovyi. Prefiro enfrontarme a Tavares un día que facelo cada xornada nos adestramentos contra Pustovyi». Foron palabras do pivote Marek Blazevic antes da visita a Sar do Real Madrid no mes de decembro. Razón non lle falta ao lituano, que ten que sufrir todos os días as consecuencias de medir o seu potencial co xigante obradoirista. Nunha entrevista en La Voz de Galicia, Blazevic recoñeceu que «na ACB hai grandes xogadores, cincos con moita calidade e talento», pero Pustovyi é capítulo á parte.
No seu cuarto curso en Sar, na súa segunda etapa despois de pasar polas filas do Barcelona, Gran Canaria e Murcia, o ucraíno está asinando uns rexistros espectaculares, liderando algún dos ránkings da Liga Endesa ante grandes monstros da pintura. Marcar a Pustovyi é unha constante dor de moas.
De feito, frear os 2,19 metros do ucraíno é misión moi complicada para cada uns dos rivais que lle teñen en fronte cada fin de semana. Parar a Pustovyi require dunha enerxía extra. Claro, e tamén é necesario frearlle con faltas. Ata 137 persoais fixéronlle ao xogador do Obradoiro nos 26 encontros que levan consumido.
Pustovyi sofre 5,3 por partido, por diante de Anzejs Pasecniks (Palencia), con 5,2; Ike Iroegbu (Xirona), 4,6; Giorgi Shermadini (Tenerife), 4,6; e Chima Moneke (Baskonia), 4,5. O top 110 complétano Andrew Andrews (Joventut), con 4,3 persoais recibidas por xornada; Willy Hernangómez (Barcelona), 4,3; Facu Campazzo (Real Madrid), 4,3; Brandon Davies (Valencia Basket), 4,2; e Andrés Feliz (Joventut), 4,1 faltas.
Esta non é a única clasificación que lidera o pivote obradoirista, que conta cun repertorio infinito na súa segunda etapa en Sar. O ucraíno está á altura do mesmísimo Edy Tavares, o xigante do campión Real Madrid. Pustovyi lidera a lista e acumula un total de 43 tapóns en 26 datas, polos 32 en 19 encontros de Tavares. A media de ambos é idéntica: 1,7 tapóns por cada fin de semana. Tras o obradoirista están Sacha Killeya-Jones (Bilbao Basket), con 40 gorrazos; Vincent Poirier (Real Madrid), 40; Matt Haarms (Palencia), 35; e Ben Lammers (Gran Canaria), con 34. Completan o top10 Edy Tavares (Real Madrid), con 32 tapóns; o ex do Obra Tryggvi Hlinason (Bilbao Basket), 27; Devin Robinson (Manresa), 27; Mitchell Watt (Zaragoza), 26; e Anzejs Pasecniks (Palencia), 24.
O pivote do Obra tamén destaca noutros rexistros. É terceiro en lanzamentos de dous convertidos, con 5,2 canastras por encontro (134 en 26 datas), só por detrás de Ethan Happ, do Gran Canaria, con 5,3 (138 en total); e de Ante Tomic, do Joventut, tamén con 5,2 (109 en 21 partidos). É noveno en rebotes, cunha media de 5,7 capturas, e pecha o top10 de anotadores, con 14,1 puntos por intervención.
Os máis valorados
Pustovyi, con 17 créditos de media, é o oitavo xogador máis valorado da Liga Endesa, nunha lista que encabezan Chima Moneke (19,7), Jean Montero (do Andorra, con 19,2) e Willy Hernangómez (17,9). A sombra de Moncho Fernández na pista, Thomas Scrubb, o xogador que máis utiliza o técnico de Pontepedriña, está no posto 16 dos máis valorados da ACB este curso cun total de 14,7 créditos.
TOTAL TAPÓNS
TEMPADA 23/24
Xogador / Equipo Tapóns
1. Artem Pustovyi (Obradoiro) 43
2. Sacha Killeya-Jones (Bilbao) 40
3. Vincent Poirier (Real Madrid) 40
4. Matt Haarms (Palencia) 35
5. Ben Lammers (Gran Canaria) 34
6. Edy Tavares (Real Madrid) 32
7. Tryggvi Hlinason (Bilbao) 27
8. Devin Robinson (Manresa) 27
9. Mitchell Watt (Zaragoza) 26
10. A. Pasecniks (Palencia) 24
50. Thomas Scrubb (Obra) 9
FALTAS RECIBIDAS
TEMPADA 23/24
Xogador / Equipo Media e total
1. Artem Pustovyi (Obra) 5,3 (137)
2. A. Pasecniks (Palencia) 5,2 (134)
3. Ike Iroegbu (Xirona) 4,6 (120)
4. G. Shermadini (Tenerife) 4,6 (120)
5. Chima Moneke (Baskonia) 4,5 (112)
6. Andrew Andrews (Joventut) 4,3 (90)
7. Willy Hernangómez (Barça) 4,3 (111)
8. F. Campazzo (R. Madrid) 4,3 (102)
9. Brandon Davies (Valencia) 4,2 (89)
10. Andrés Feliz (Joventut) 4,1 (91)
31. Jordan Howard (Obra) 3,0 (68)