No derbi xogou o seu partido 93 coa camiseta do Obradoiro na ACB
25 mares 2024 . Actualizado ás 20:37 h.Só un xogador supera os douscentos partidos coa camiseta do Obradoiro na ACB. Trátase do andaluz Pepe Pozas, con 202 intervencións. Outros seis conseguiron pasar as cen participacións co conxunto compostelán. Son Alberto Corbacho (164); o capitán Álvaro Muñoz, que terá que quedar este curso en 131 por unha lesión de longa duración; Artem Pustovyi, que acabará a tempada en cuarto lugar con 120 presenzas; Álex Suárez (110), en quinta posición; Rafa Luz (103) e Pavel Pumprla (103).
Xa sen opcións de acadar o centenar de encontros como obradoiristas están Nacho Llovet (95) e Eimantas Bendzius (94). Quen si superará esta cifra, se as lesións lle respectan nas oito xornadas que faltan para concluír a fase regular na Liga Endesa, é o canadense Thomas Scrubb, que contabiliza 93 actuacións co conxunto da capital galega na máxima categoría do baloncesto español. Coa súa participación no derbi do sábado ante o Breogán na caldeira de Sar, o de Montreal superou na o ránking histórico ao seu compatriota Kassius Robertson, hoxe no Valencia Basket, con 92 citas en tres tempadas.
Fronte ao Breogán, Scrubb conseguiu algo que está ao alcance de moi poucos. O xogador canadense non se sentou no banco durante o derbi. Disputou os 40 minutos e concluíu a súa intervención con 12 puntos, 10 rebotes, 5 asistencias e 23 de valoración, os mesmos créditos que acadou Artem Pustovyi (19 puntos e 6 rebotes). No derbi, Marek Blazevic igualou con 58 encontros a Ben Simons e superou os 57 de Vladimir Brodziansky.
No ránking histórico de asistencias, nunha clasificación que liderará eternamente Pepe Pozas, con 704 pases de canastra, Thomas Scrubb subiu un posto. Leva, coas cinco do derbi, 156. Superou as 155 asistencias do base norteamericano Donnie Mcgrath. Está no posto 12, a só catro pases do seu irmán Phil. En poucos partidos accederá ao top10.
Valoración
No histórico de valoración, Scrubb e Pustovyi manteñen unha vibrante loita polo segundo posto. Ambos están a cen créditos do líder, o mallorquino Alberto Corbacho (1.415). Canadense e ucraíno, que acadaron os 23 créditos no derbi, están separados por só dous, con vantaxe por agora de Pustovyi (1.319). Terceiro na lista está Robertson.
Tras superar ao Breogán no duelo de máxima rivalidade e saír dos postos de descenso, o Obradoiro xa ten todos os sentidos postos no Barcelona, o seu próximo adversario en Sar (domingo, ás 18.30 horas). O Barça vén de arroiar ao Joventut en Badalona (75-93). O conxunto azulgrana aproveitou o acerto de Darío Brizuela tras o descanso para romper o encontro e levar a vitoria da cancha do Joventut, cun triunfo coral, con Ricky Rubio como o máis valorado.