Será a primeira das nove finais que quedan aos composteláns
19 mares 2024 . Actualizado ás 21:28 h.Ao Obradoiro, que vive a súa peor crise desde o retorno á ACB, ao contabilizar dez derrotas consecutivas e estar situado en posto de descenso, quedan nove finais para acabar o curso. Nove partidos dramáticos, intensos e de máxima esixencia. Con todo, xogadores e técnicos só pensan a curto prazo. Non queren saber nada do que poida pasar despois deste sábado, xa que toda a atención está posta no próximo compromiso.
O derbi ante o Breogán será máis que unha final. Ao Obra vaille máis de media vida no envite. Un resultado negativo podería deixar mortalmente ferido o colectivo que prepara Moncho Fernández, sobre todo despois da inesperada vitoria do conxunto breoganista ante o Barcelona. O duelo galego de Sar será clave para o futuro dos composteláns. Xa o era antes desta pasada xornada, pero agora a situación agravouse aínda máis despois da badalada que asinaron os lucenses fronte aos cataláns.
Ao Obradoiro quedan nove etapas para concluír o maratón, pero se cae no derbi o panorama poráselle demasiado escuro. Cada xornada que pasa son menos os candidatos ao descenso. A fin de semana anterior, tres posibles adversarios do Obra deron un paso de xigante cara á salvación, anotando a súa décima vitoria, catro máis das que levan agora os composteláns. O Bilbao Basket superou ao Joventut de Badalona (92-71), o Zaragoza desfíxose do pechacancelas Palencia (103-96) e o Bàsquet Xirona dobregou contra todo prognóstico ao europeo Basket Valencia (92-88).
Agora, excluídos estes tres, a pelexa pola permanencia redúcese a tan só cinco candidatos para dúas prazas: Andorra (8-17), Selecta (7-18), Breogán (7-18), Obradoiro (6-19) e Palencia (5-20). O conxunto da capital galega deberá enfrontarse a tres destes adversarios. Despois de recibir ao Breogán este sábado, os de Moncho Fernández terán outros dous duelos directos na antepenúltima xornada fronte ao Andorra en Sar e na penúltima data na cancha do faroliño vermello Palencia. Con todo, o Obra terá que facer os deberes en Sar e noutras canchas ás que deberá viaxar, pois non lle abondará chegar con seis ou sete vitorias ás semanas finais.
Tras o derbi, o Obradoiro xogará un segundo encontro consecutivo como local. Recibirá ao Barcelona. Para comezar abril, visita ao Zaragoza e recibe ao Manresa. O cuarto mes do ano concluirá con dous desprazamentos ás canchas do Bilbao Basket e do Real Madrid. Xa en maio, para pechar o curso, dous encontros en casa e un fóra. Os galegos enfrontaranse en Sar ao Andorra e ao Joventut de Badalona, na última xornada da liga regular. No medio destes dous duelos, visita á cancha do Palencia.