Juan Carlos I descansou o xoves e está previsto que saia hoxe a adestrarse en augas da ría

O segundo día do rei emérito en Sanxenxo, tras a súa chegada á capital turística das Rías Baixas o pasado mércores, transcorreu con total tranquilidade, sen ningunha exposición de Juan Carlos I ás cámaras e fotos dos medios de comunicación. Esta é a segunda visita do anterior Xefe do Estado a Sanxenxo no que vai de ano e está previsto que se produzan máis, polo menos una ao mes, para que poida participar na liga española de embarcacións de seis metros, que se disputará ata novembro nas augas da ría de Pontevedra. No outono, ademais, terá lugar o campionato europeo desta categoría de embarcacións deportivas e o rei emérito defenderá nesa ocasión o seu título de campión.

Así pois, a xornada do mércores foi moito máis tranquila do habitual, tanto no porto como diante da casa do seu amigo Pedro Campos en Nanín, onde se hospeda como xa é habitual nestas visitas. A intención do monarca emérito é normalizar a súa presenza tanto en Sanxenxo como en España e, de aí, a frecuencia das súas visitas programadas, para así ir aos poucos restándolle impacto mediático. Este perfil baixo ou de mínima exposición aos veciños e aos medios de comunicación é a postura adoptada por Juan Carlos I, nas súas últimas visitas.

Pola súa banda, os operarios do porto de Sanxenxo baixaron este xoves pola mañá o Bribón ao mar, onde permanece atracado no pantalán do fondo do espigón, xunto ás lanchas pneumáticas que se empregarán para facelo saír ao mar.

A previsión para este venres é que Juan Carlos I si saia de casa para subirse ao Bribón a media mañá e adestrarse pola ría. As mangas da regata libraranse o sábado e o domingo, día este último en que se entregarán os premios.

---

---

---