O PP e o BNG de Sanxenxo polemizan sobre a atribución do servizo
28 mares 2024 . Actualizado ás 05:00 h.O Edificio de Usos Múltiples de Portonovo dispón xa dunha aula de estudo, un servizo co que o Concello de Sanxenxo aspira a dar resposta a unha demanda histórica dos estudantes deste municipio. Este aula abrirá as súas portas para o público o 2 de abril, cun horario continuo, de martes a venres, de 9 a 23 horas, mentres que os luns será algo máis breve, de 9 a 16 horas.
O alcalde, Telmo Martín, e a concelleira de Cultura, Elena Torres, visitaron estas instalacións, acompañados de estudantes da localidade. A aula terá unha capacidade para 32 persoas, dispón doutras tantas cadeiras e de oito mesas con enchufes e conexións para cargar o teléfono móbil.
Ademais, estas dependencias contan con conexión a Internet e novas luminarias tipo led, que reducen o consumo enerxético. Este servizo complementa a outros que se prestan neste equipamento como as clases de adultos, as sesións de técnicas de estudo, as actividades da asociación de mulleres rurais e os ensaios da coral Lembranzas.
Pola súa banda, o BNG e o executivo do popular Telmo Martín polemizaron onte sobre a atribución da entrada en servizo da aula de estudo. Mentres que os populares sosteñen que eles levan un tempo xestionando a súa posta en marcha, tamén recalcaron que no proxecto do novo mercado para Sanxenxo, na rúa Madrid, prevese unha aula de estudos e unha biblioteca no mesmo edificio.
Co local recentemente estreado, a edila de Cultura sostivo: «Atendemos a unha importante demanda dos mozos de Sanxenxo, e da cidadanía en xeral, habilitando un espazo en condicións onde poder estudar, nun ambiente tranquilo, agradable e que favorece a concentración».
Pola súa banda, o BNG de Sanxenxo emitiu un comunicado bastante belixerante co executivo do PP. O Bloque «celebra de que, despois de tantos anos recamándoa, a aula de estudo de Sanxenxo sexa unha realidade». O seu portavoz, Fran Leiro, destacou que «foi o seu grupo o que deu traslado, a traveso de moción plenarias, das numerosos peticións que realizaron os veciños do concello que precisan dunha dependencias cun horario axeitado para poder preparar oposicións ou exames».
«Alegrámonos de que, aínda que sexa con anos de retraso o señor Telmo Martín reaccionase», sostivo o portavoz nacionalista Fran Leiro.