O presidente e cofundador do Poio Pescamar deixa o club tras 26 anos á fronte
POIO
Juanjo García recoñece queno pode compaxinar o seu traballo co club. O equipo xoga esta tarde na Seca contra o Roldán
22 mares 2024 . Actualizado ás 17:15 h.A véspera de que o Poio Pescamar reciba na pista da Seca ao Roldán, o club cambiou de mans. Juanjo García deixará o club que preside desde hai 26 anos e que fundou xunto a Vicente Pérez Pérez, o seu actual secretario. Así o acordaron na última asemblea de socios e fíxose oficial este xoves. «Teño unha mestura de sentimentos, estou orgulloso dos que conseguimos e o club que construímos, pero doutra banda estou apenado por deixar a presidencia», recoñece Juanjo García, que tivo que dar un paso ao carón por motivos persoais. «O meu traballo non me permite compaxinalo», explicou este venres.
O seu posto ocuparao agora Olalla Folla Barros, que ata agora exercía como tesoureira. Estes cambios na dirección implica que José Antonio Nacemento Mayáns asuma os labores de tesourería.
Á marxe dos cambios na xestión, o Poio segue buscando na pista meterse no play off polo título. O Roldán chega ao pavillón da Seca como o sexto clasificado, a dous puntos das rojillas, que enlazaron seis vitorias consecutivas en liga. Nas dúas últimas xornadas foron capaces de manter a portería a cero en pistas tan complexas como as do Alcorcón e Ourense.
O equipo de Kilian Belmonte, pola súa banda, chega esta tarde (18.30 horas) despois de ter goleado ao Amarelle na última xornada. As súas aspiracións de meterse no play off son tan altas como as do Poio. De feito, só perderon cinco partidos en todo o campionato, uns números que só melloran o Burela e o Atlético Navalcarnero.