O Café Quico de Cuntis, 104 anos de historia e un talismán para os premios da lotería e para o Dépor
CUNTIS
O Concello réndelle unha homenaxe co gallo da Festa do Lacón con Grelos para destacar que teña sido testemuña da historia da vila
29 feb 2024 . Actualizado ás 20:18 h.Cuntis vive os seus días grandes coa celebración da Festado Lacón , que hai tempo que vai moito máis alá de fincarlle o dente a un dos manxares da terra. O Lacón é festa en todos os sentidos, tamén para homenaxear a eses locais que fixeron e fan historia no municipio. Este ano, o Concello vaille a render tributo ao Café Quico, que leva a friorenta de 104 anos sendo testemuña da vida desta vila termal e non ten pinta de que vaia a deixar de selo. Do Café Quico pódense escribir infinitas referencias, pero sobre todo que é un talismán para os premios da lotería, xa que deu uns cantos, e tamén para o Deportivo da Coruña, xa que foi sede da pena local deste equipo e aí celebráronse unhas cantas vitorias (e choráronse derrotas, que diso houbo tamén).
O Concello, ao longo da Gala do Chapante, que terá lugar este venres día 1 de marzo, faralle entrega dun obsequio aos responsables do establecemento e lembrarase a historia do bar. Haberá que viaxar entón ata o ano 1920, porque foi entón cando Perfecto Alonso montou este mítico café no que un día fora o comedor do hotel Rivas, construído no século XIX. Comezou entón a traxectoria do Quico, que foi pasando de xeración en xeración e que agora rexentan Tito Alonso e a súa filla Esther. Mención especial tamén haberá para José Manuel e Pepiño, que tras moitos anos ligados ao Quico son considerados dous membros máis da familia.
A Gala do Chapante, a figura emblemática do entroido de Cuntis, celebrarase no centro cultural Patelas ás 21 horas.
Concerto gratuíto
Doutra banda, o Concello de Cuntis confirmou que finalmente o concerto de Antonio José será gratuíto ata completar a capacidade. Devolverase o diñeiro ás persoas que adquiriron entradas. A cita é este sábado.