Este martes arrincou a repartición de chalecos reflectores entre usuarios vulnerables: «Pero, son gratis?», preguntábanse algúns peregrinos sorprendidos da iniciativa
08 may 2024 . Actualizado ás 15:09 h.Coa repartición de chalecos reflectores e folletos informativos entre os peregrinos que transitan por San Amaro, en Barro, en dirección a Santiago, a Garda Civil de Tráfico de Pontevedra iniciou este martes unha campaña informativa. E fíxoo ante a sorpresa da maioría de camiñantes, algúns dos cales se mostraban remisos inicialmente a coller un chaleco ata que lles indicaban que era gratuíto.
Esta iniciativa ten como transfondo uns datos de sinistralidade viaria na provincia «negativos». «Na provincia de Pontevedra atopámonos con doce falecidos ata o 6 de maio, o 50 % do total de falecidos do ano pasado», lamentou Abel Losada recoñecendo que «é o peor rexistro desde o ano 2020. Hai un claro cambio de tendencia».
Un dos aspectos máis preocupantes é o feito de que oito dos doce mortos, dúas terceiras partes, eran usuarios vulnerables: catro motoristas, dous peóns e outros tantos usuarios de ciclomotor. No caso destes últimos, a provincia de Pontevedra non rexistraba ningún falecemento desde o 2020, mentres que as dous peóns falecidas «circulaban por cunetas, tanto nunha vía autonómica como na VG-20, sen ningún tipo de elemento reflector e de noite», engadiu.
Tras precisar que dúas de cada tres mortes prodúcense en estradas de titularidade autonómica, o subdelegado do Goberno sostivo que «é conveniente facer un chamamento á responsabilidade. Isto é un problema de todos, é un problema transversal».
Pola súa banda, o tenente do Subsector de Tráfico de Pontevedra insistiu en que os peóns deben transitar «pola beiravía o máis orillados á esquerda posible», á vez que recoñeceu que aínda hai persoas renuentes a empregar pezas reflectoras. É por iso que lles instou «a que sexan conscientes da elevada exposición ao risco de sufrir un sinistro viario e as consecuencias graves» que isto pode ter.
De igual modo, remarcou o lema de «ver e facerse visibles» para o resto de usuarios das estradas, á vez que subliñou que esta campaña tamén se enfoca na sensibilización dos condutores, que sexan conscientes do risco que poden correr os colectivos vulnerables e que extremen as medidas de seguridade.