Gala benéfica de Afapo, asociación de persoas con alzhéimer, polo seu vinte aniversario
PONTEVEDRA
A actividade terá lugar o 5 de abril no Auditorio de Afundación en Pontevedra
24 mares 2024 . Actualizado ás 19:27 h.O Auditorio de Afundación en Pontevedra albergará o próximo 5 de abril, ás 20.00 horas, a gala benéfica polo vinte aniversario de Afapo, a asociación de familiares de persoas con alzhéimer e outras demencias da provincia de Pontevedra. Presentada por Belén Hermida, haberá historias e varias actividades, ademais dun concerto dos Black Stones.
Afapo naceu o 19 de febreiro do 2004 da inquietude dun grupo de familiares afectados polas consecuencias desta enfermidade. Ademais de prestar asistencia psicolóxica ás familias, entre os seus obxectivos figuraba a difusión da importancia dun diagnóstico precoz da demencia e impulsar a atención integral e especializada dos usuarios.
A asociación xestiona o centro de día público de alzhéimer de Pontevedra, pertencente á rede da Xunta e que conta con 35 prazas na rúa Pedro Sarmiento de Gamboa; e o centro de día privado de Marín, en colaboración con Afaga de Vigo e que ten 25 prazas. Ademais desenvolve un programa de prevención e promoción da saúde, no que participan 75 persoas maiores de 65 anos sen diagnóstico de demencia, que se imparte en Pontevedra, Poio e Marín.
Familias e coidadores
Afapo realiza terapias de estimulación cognitiva para persoas con diagnóstico de demencias cos concellos de Pontevedra, Silleda, Marín e Moraña. Tamén impulsa cursos para familias e coidadores en Pontevedra, Poio, Silleda, Cerdedo-Cotobade ou Moraña. O obxectivo, din desde o colectivo, ofrecer apoio psicolóxico e funcional para previr a aparición da chamada síndrome do coidador, diminuíndo a sobrecarga emocional que provoca a situación dos coidados continuos a unha persoa con demencia neurodegenerativa e deterioración cognitiva e funcional. Participan 125 persoas.
En total, Afapo atende actualmente a 370 persoas de forman mensual en distintos proxectos na provincia. Son 170 usuarios en diferentes concellos e en variadas fases da enfermidade; 75 persoas sen diagnóstico para a prevención da deterioración cognitiva; e 125 nos cursos para familias e coidadores.