A institución reitera o requirimento tras admitir a trámite unha queixa dunha nai da área sanitaria de Pontevedra e O Salnés
20 mares 2024 . Actualizado ás 19:47 h.A Valedora do Pobo volveuse a dirixir á Consellería de Sanidade que para que remita á institución o informe demandado sobre o funcionamento do servizo de logopedia do Sergas. A actuación enmárcase na queixa presentada por unha nai da área sanitaria de Pontevedra e O Salnés, que foi admitida a trámite. Ese paso produciuse o pasado 16 de febreiro e dábase un prazo de quince días para que a Administración autonómica facilitase información sobre os problemas que motivaran a queixa. Ante a falta de contestación, o 18 de marzo a Valedora do Pobo, María Dolores Fernández Galiño, volveu pórse en contacto coa proxenitora, Verónica Rial Freijeiro, para trasladarlle que se reiterou o requirimento de información. «En relación coa queixa que vostede presentou nesta institución, dado que a Consellería de Sanidade, aínda non remitiu o informe demandado, o día de hoxe [18 de marzo] requirímolo novamente, recordando expresamente que tal envío resulta unha obriga legal», exponse no escrito.
Esta nai trasladou tamén ao alcalde de Barro , Xosé Manuel Fernández Abraldes (BNG), a súa preocupación por unha situación que afecta á súa filla Sara, de 9 anos. No 2016 operárona para realizarlle un implante coclear binaural para combater o seu hipoacusia profunda. Segundo a proxenitora, a nena necesita o tratamento logopédico e o seu temor é que o Sergas deixe de prestarllo cando cumpra 10 anos. O Colexio Profesional de Logopedas de Galicia afirma que non existe ningún protocolo, programa, orde ou instrución dentro do Sergas que estableza como ha de ser a atención en nenos maiores de 3 anos ou adultos implantados.