O covid acelerou a dixitalización de boa parte da colección permanente
25 feb 2024 . Actualizado ás 05:00 h.A pandemia do covid-19 foi un punto de inflexión no Museo de Pontevedra. O confinamento determinou que se restrinxisen as saídas e os museos quedaron baleiros, polo que os responsables por entón do de Pontevedra decidiron dar o paso para levar a cabo un proceso de dixitalización de . «os espazos expositivos e zonas comúns dos edificios Castelao e Sarmiento, así como das obras seleccionadas que se empreguen na plataforma de visitas virtuais 360º en resolución xigapixel»Foi toda unha revolución á hora de entender este espazo cultural.
O obxectivo que se buscou foi a creación dunha contorna que permitise que os usuarios navegasen polas salas de modo inmersivo, así como tivesen capacidade para interactuar con máis de medio centenar de obras de arte. Para isto último, foi preciso acometer unha dixitalización das mesmas en alta definición e que se posibilitase o acceso á información relevante das mesmas.
Tratouse dun proxecto moi ambicioso, tendo en conta que o Edificio Castelao conta con vinte e tres salas distribuídas en tres plantas, mentres que o Edificio Sarmiento dispón de oito salgas en dúas alturas, e a intención foi que a dixitalización de todas estas contornas fose totalmente inmersiva e libre de puntos cegos para que os usuarios tivesen total liberdade de movementos.
A isto sumouse o feito de que, os responsables do Museo seleccionaron as obras que se dixitalizaron, un total de 62. Deste xeito, polo menos, vinte e catro están dispoñibles en definición gigapixel e as restantes en alta resolución.
O contrato foi adxudicado á empresa madrileña The Mad Pixel Factory por 113.688,58 euros (IVE incluído), firma que habilitou unha plataforma web de visitas virtuais 360º que, entre outras capacidades, permite seleccionar as obras dixitalizadas. Cada unha delas, en principio, ofrece a posibilidade de despregar «un hotspot con contidos variables que permitirán enriquecer de valor a visita das persoas usuarias como storytelling textual con contido explicativo...».
Tres idiomas dispoñibles
Esta información está dispoñible en tres idiomas —galego, español e inglés—, de tal modo que debe ofrecer ao visitante un mínimo de sete detalles ou fitos por peza seleccionada. E é que «un dos principais retos aos que se enfrontan os museos na actualidade é o da transformación dixital para adaptarse ás crecentes demandas do público e para promover a plena accesibilidade e igualdade real entre tódolos seus visitantes», engadiron.
A nova plataforma entrou en funcionamento a finais de xullo do 2022, hai exactamente ano e medio. Nestes dezaoito meses, a Deputación de Pontevedra acordou en febreiro do 2023 unha primeira prórroga do contrato no que se refire aos servizos de soporte e mantemento —correctivo, evolutivo e perfectivo—, mentres que o pasado 30 de xaneiro, previo informe da xefa de xestión, acordouse unha segunda prórroga neste sentido.
O propio contrato establecía «a posibilidade de dúas prórrogas dun ano de duración cada unha delas» asumindo durante este período de tempo a corrección de incidencias, así como a actualización e inclusión de novas funcionalidades. En todo caso, o Museo de Pontevedra «considera a incorporación das novas tecnoloxías como unha ferramenta fundamental no proceso de transformación dixital», á vez que «aporta unha maior visibilidade á institución, permite incrementar o número de visitantes virtuais, e proporcionar novos servizos susceptibles de interesar a un novo perfil de público que demanda unha forma diferente de relacionarse coas coleccións dos museos».
Visitas temáticas ou realizar percorridos por libre
Un dos principais atractivos que ofrece a plataforma do Museo de Pontevedra é a posibilidade de realizar ata sete percorridos temáticos, pero tamén realizar unha visita por libre polas distintas estancias ou, mesmo, gozar dun tour de benvida. Ademais, en principio, é unha tecnoloxía que permitiría, de igual modo, participar en visitas virtuais guiadas en directo coordinadas polo persoal da entidade cultural.
En canto aos percorridos temáticos ofertados na actualidade, estes son os do Museo en quince obras, no que se visualizan unha quincena de pezas desde a Prehistoria ata o século XX; Nas salas de arqueoloxía, unha inmersión no pasado desde a Prehistoria ata a romanización do noroeste peninsular; A arte galega do Medievo a Castelao, cunha selección de once pezas singulares da arte galego; Renovación e vangarda na arte galega do século XX, itinerario centrado en dez obras do pasado século; Castelao, un artista e personaxe crave na historia de Galicia, centrado «no estilo e pensamento do debuxante, pintor, escritor e político»; Artistas con M de muller, polo se visibiliza a nove creadoras durante décadas ignoradas ou esquecidas; e Tempos de angustia, terror e exilio, onde o fío condutor é a arte en tempos de guerra ao redor de oito obras de catro artistas galegos.
Outras das vantaxes deste plataforma é que está deseñada para facilitar a compilación de datos estatísticos dos usuarios, unha información que «permite a valoración do interese e atractivo de cada un deles e a toma de decisións con respecto a desenvolvementos ou modificacións puntuais futuras».