Policías nacionais e gardas civís mobilízanse en Pontevedra reclamando ser recoñecidos como profesión de risco
PONTEVEDRA
Ás portas da Subdelegación de Goberno, esixiron unha xubilación digna e igualdade de dereitos con outros corpos
16 feb 2024 . Actualizado ás 19:22 h.Varias decenas axentes da Policía Nacional e da Garda Civil concentráronse este venres ás portas da sede da Subdelegación do Goberno en Pontevedra para reclamar unha xubilación digna e igualdade de dereitos sociolaborais con outros corpos de seguridade, caso dos Mossos d'Esquadra e a Ertzaintza, pero tamén as policías locais.
Tras gardar un minuto de silencio en homenaxe dos dous gardas mortos en Barbate ao ser arroiados por unha narcolancha, Sandra Fernández Rodríguez, secretaria provincial do Sindicato Unificado de Policía (SUP), explicou que, ademais dunha xubilación digna, demandan ser recoñecidos como unha profesión de risco: «Somos as únicas forzas e corpos de seguridade que non somos profesión de risco. Si o son as policías locais, as azafatas, os artistas... Queremos unha plena equiparación», engadiu remarcando que na actualidade un policía nacional ou un garda civil sofre unha perda de catrocentos euros mensuais ao xubilarse se se compara cos Mossos ou a Ertzaintza.
Sandra Fernández lamentou que Interior e o seu responsable, Fernando Grande-Marlaska, «non nos dota de medios suficientes para atender situacións que estamos a vivir ultimamente. O falecemento dos compañeiros gardas civís foi debido a que temos un material completamente obsoleto e non nos dota de medios, nin humanos, nin materiais para abordar cuestións tan delicadas como pode ser o tráfico de sustancias estupefacientes no Campo de Xibraltar ».
De igual modo, Manuel Novoa Buceta, da Asociación Unificada de Gardas Civís (AUGC), precisou que ao acadar a reserva, no caso dos gardas, ou a segunda actividade, no suposto dos policías, «o que nos queda é o soldo e trienios, máis un complemento por dispoñibilidade», mentres que a xubilación «ven taxada polos Presupostos Xerais do Estado. En función do grupo que ocupes quédanos a pensión que estipula o Goberno».
En opinión de Novoa Buceta, a solución viría «por recoñecernos como profesión de risco, o que faría é meterlle un porcentaxe a esa pensión. Esta é a mellor para nós», sostivo o dirixente da AUGC apuntando que unha segunda posibilidade podería ser o pasarlles ao grupo B da escala de funcionarios, pero «isto só afectaría aos que son máis xóvenes porque para cobrar íntegra a pensión do grupo B tes que estar 35 anos traballando nese grupo».