O Congreso Nacional de Numismática debaterá «sobre o futuro do estudo e a divulgación desta disciplina»
28 sep 2023 . Actualizado ás 19:36 h.Entre o 12 e o 14 de setembro do 2024, Pontevedra converterase na capital española da numismática ao acoller o dezasete Congreso Nacional de Numismática. Durante estes tres días, no Edificio Castelao do Museo debaterase «sobre o futuro do estudo e a divulgación desta disciplina». Deste xeito, retomarase un evento que non se celebraba desde o 2018, ano da súa última edición celebrada en Barcelona.
Organizado polo Museo en colaboración coa Sociedade Iberoamericana de Estudos Numismáticos, e contando co patrocinio da Real Casa da Moeda, o congreso desenvolverase baixo o lema de . Numismática, que e para que? Xeración e transferencia de coñecementoEstá previsto que se programen conferencias e mesas de debate, así como presentaranse estudos recentes sobre coleccións, novos achados e proxectos de investigación en desenvolvemento, e completarase coa exhibición de pósteres e actividades didácticas.
«Esta edición pretende xerar un espazo de diálogo común no que participen especialistas e persoas iniciadas, achegar a disciplina a quen non a coñece e xerar un compromiso de coparticipación entre aqueles que a manteñen vixente, en aras de crear novas dinámicas que garantan o seu porvir», destacaron desde a Deputación de Pontevedra.
Fondos do Museo
Antonio Roma Valdés (León, 1967), fiscal, doutor en Historia pola Universidade de Santiago, investigador e experto en moeda medieval será o responsable da coordinación científica do congreso que celebrou a súa primeira edición en Zaragoza en 1972.
Con respecto á elección de Museo como sede deste seminario, desde a Deputación precisaron que pon de relevo a importancia da colección numismática que atesoura esta entidade cultural: «A súa orixe está nos fondos monetarios que xuntou a Sociedade Arqueolóxica, fundada en 1894. As doazóns de particulares e coleccionistas, os depósitos de pezas provenientes de escavacións arqueolóxicas e a adquisición de coleccións foron incrementando a colección ata as arredor de 15.000 moedas coas que conta na actualidade».
Deste xeito, precisaron que, entre todos os fondos que se gardan, destaca a denominada Colección Blanco Cicerón, formada desde o século XIX, pero tamén as series de moedas acuñadas en Galicia. «A composición da colección abrangue desde a antigüidade, con moeda grega, romana, árabe e bizantina; ata a correspondente á historia española desde a Idade Media á contemporánea, así como toda unha serie de moeda estranxeira de época contemporánea», engadiron desde o Museo.