O rexedor Amador Díaz visitou aos produtores locais para coñecer as súas técnicas e procesos
16 abr 2024 . Actualizado ás 05:00 h.O alcalde de Xinzo de Limia, Amador Díaz, rematou este luns a súa visita oficial á provincia de Tungurahua, en Ecuador , para intercambiar as realidades do sector agrícola. O rexedor da Limia coñeceu de primeira man as técnicas e procesos empregados no país americano para optimizar a produción, reducir o impacto ambiental e xerar valor engadido aos seus produtos.
Díaz visitou a Asociación de Produtores Agrícolas de Rubro Papa para observar o procesamiento e comercialización de aperitivos a base de pataca, así como a planta de procesamiento Exprofrut, onde a colaboración entre o sector público e privado está detrás da venda de pulpas de froita naturais. Buscando similitudes co produto de Xinzo, acudiu ao Centro de Provisión e Comercialización de Pataca para ver o traballo dos agricultores locais.
Varios alcaldes de diferentes localidades, de Mocha ou de Tisaleo, recibiron ao rexedor para intercambiar aspectos históricos ou culturais e iniciar unha cooperación internacional. Díaz mostroulles a máscara dunha pantalla do Entroido.
O rexedor de Xinzo explorou oportunidades de colaboración en diversas áreas co sector agroindustrial de Tungurahua, como o intercambio de coñecementos e tecnoloxías, a promoción de produtos locais en mercados internacionais ou o desenvolvemento de proxectos conxuntos de investigación e innovación. Desde o goberno local, explicaron que esta viaxe reafirma o compromiso do Concello co fomento do desenvolvemento rural e a internacionalización do municipio.