Produtores de sete concellos únense baixo a marca común «Arraigamento á terra»
SAN XOÁN DE RÍO
O proxecto inclúe unha plataforma de venda en Internet e máquinas de «vending»
02 dic 2023 . Actualizado ás 05:00 h.Produtos de primeiro nivel elaborados por artesáns que apostaron polo rural para emprender ou que manteñen un negocio familiar que evidencia que non sempre hai que apostar polas grandes urbes para ter éxito. «Temos o noso propio tesouro, que temos que defender», resumiu o actor Sergio Pazos, que exerceu como mestre de cerimonias na presentación de Arraigamento á terra, a marca que aglutina a unha trintena de produtores de sete concellos da provincia de Ourense. Pazos mesmo lanzou un conxuro (ao que se uniron todos os asistentes) chamando ao éxito do proxecto. Comezará co próximo lanzamento dun marketplace, é dicir, un portal de Internet no que poder adquirir os produtos e que cheguen á porta de casa. «Buscamos darlle aos produtores ferramentas para que vendan», resumiu o alcalde de San Xoán de Río, Xosé MiguelPérez . Teno claro: «Non imos competir en prezo, senón en calidade».
Arraigamento á terra é unha marca creada dentro do proxecto Ourense Norte Reacciona, que lanzou o Concello de San Xoán de Río. Nun primeiro momento a súa proposta estivo apoiada por unha quincena de concellos, aínda que despois a cifra se foi reducindo ata quedar nos sete que acudiron á presentación. Ademais de Río están os concellos de Larouco , O Bolo, Vilariño de Conso, A Veiga, Viana do Bolo e A Teixeira. O tenente de alcalde do Bolo, Miguel García, destacou a visibilidade que supón para os produtores estar baixo o paraugas de Arraigamento á terra. «Imos ir con esta marca a todas as feiras de alimentación de España», avanzou.
Ata o momento hanse unido máis dunha trintena de produtores dos sete concellos participantes, que ofertarán na plataforma de venda máis de 150 artigos diferentes, que van desde viño a bica, pasando por embutidos, pan, doces ou mesmo veas aromáticas, marmeladas ou mel. «Aos produtores dos concellos que non se sumaron, dicirlles que non se preocupen, que imos contar con eles», engadía Pérez. O proxecto está financiado polo Ministerio de Comercio cun total de 300.000 euros (os concellos deberán achegar o 10 %) e incluirá ademais da plataforma web, a construción de tres almacenes para que os produtores poidan almacenar os seus produtos e desde aí envialos xuntos nun único paquete (se hai pedidos de varios diferentes) e de consignas en todos os concellos, a contratación dun administrativo e dous comerciais, a instalación de máquinas de venda e a dotación dunha caseta para ir ás feiras. O proxecto rematará en xuño e despois seguirá de man dos produtores.