O venres remata o prazo para inscribirse no desfile do domingo pola tarde
08 feb 2024 . Actualizado ás 19:01 h.Rubiá vivirá o domingo o día grande do entroido. Ás cinco da tarde comezará o desfile de comparsas e carrozas, que sairán desde a praza dá Baicela para rematar no pavillón tras facer unha breve parada na residencia de maiores San Cosme para saudar aos usuarios, que agardan a colorida visita con gran alegría.
Para fomentar a afluencia, o Concello conta con axudas á participación en efectivo. Así, os grupos de entre 12 e 20 membros recibirán 150 euros, cantidade que ascende a 200 para os que estean integrados por entre 21 e 35 disfraces, mentres que os que superen esa cifra recibirán 250 euros. Os interesados en participar no desfile do domingo teñen de prazo ata hoxe mesmo para apuntarse. Poden recibir máis información nas oficinas municipais.
O desfile estará amenizado pola charanga Unión Phenosa. O grupo de Chantada chegará para facer bailar a disfrazados e mirones cos temas máis divertidos do seu repertorio. E despois do percorrido, seguirán tocando no polideportivo, onde todos os presentes reporán forzas cun ágape a base de bolos preñados, empanada e bebidas.
O domingo será o día reservado para os grupos de amigos, as asociacións e as familias, é dicir, para xente de todas as idades. A cita de mañá, en cambio, está especialmente dirixida para os máis pequenos da casa. Desde as cinco da tarde, na praza do Concello haberá música, xogos e chocolatada.
O único en Valdeorras
O desfile do domingo en Rubiá adoita estar moi concorrido. Non só van veciños da localidade, senón que tamén se desprazan comparsas desde outros puntos da comarca de Valdeorras. A isto axuda o feito de que ese día non hai desfiles en ningún outro punto da zona, o que facilita a participación. De feito, unicamente o martes é preciso elixir onde quere gozar un do desfile sen saír da comarca, porque o resto das xornadas non coinciden no calendario. O venres a cita é no Bolo, o sábado en Vilamartín de Valdeorras e o martes na Rúa, O Barco e A Veiga.
O ano pasado participaron oito comparsas no desfile de Rubiá: Granxa Ecolóxica, En que Xardín me Metín, Poker Face Rubiá, Quereño Prehistórico, Mosqueteiros Asfaval, Folión Os Viticultores de Vilamartín, Volta a ela A Veiga e Os Masais. Estiveron acompañados de numeroso público, cunha alta porcentaxe de disfrazados entre os que gozaban do pase.