Ana Pontón: «Tras anos de disparate, Ourense merece tranquilidade e bo facer»
OURENSE CIDADE
A portavoz nacional do BNG arroupa a Luís Seara no mitin central da capital ourensá
23 may 2023 . Actualizado ás 05:00 h.O BNG vai por todas nas eleccións deste domingo e así quixo escenificalo a organización nacionalista con motivo do mitin central da campaña de Luís Seara. O escenario elixido para iso foi o pavillón dos Remedios e o candidato á alcaldía contou o apoio da portavoz nacional do Bloque, Ana Pontón. «Tras anos de disparate, Ourense merece tranquilidade e bo facer», dixo.
Na súa intervención, destacou a situación de excepcionalidade que vive a capital ourensá con Gonzalo Pérez Jácome como alcalde e subliñou que «a solución non está en volver ao peor pasado desta cidade». Un resultado «histórico» do BNG é clave, segundo dixo Pontón, «para darlle futuro a esta cidade e superar o caciquismo do clan Baltar». Ademais, a portavoz nacional sinalou que ese pode ser tamén o primeiro paso para impulsar un cambio no goberno autonómico.
«Pídovos que non merquedes ese discurso de que a política é algo malo, nocivo, de que todas as persoas que nos dedicamos á política somos iguais, porque cando facemos iso estamos abrindo a porta de par en par ao fascismo e ao populismo», dixo, pola súa banda, Luís Seara, que puxo sobre a mesa os seus obxectivos básicos en caso de poder gobernar: «Non falamos de asfaltar rúas ou por bancos, que tamén hai que facelo, falamos de transformar unha realidade, non chega con xestionar de modo eficaz e eficiente, hai que ter ambición para desenvolver proxectos que sitúen a Ourense na vangarda das cidades de Europa».
O candidato nacionalista prometeu tamén prestar especial atención aos barrios e á periferia do municipio, do que destacou a súa realidade «policéntrica». A humanización de espazos, creando «novos espazos de centralidade» e a mellora da mobilidade son tamén eixos estratéxicos do seu proxecto, no que destaca como meta transversal «devolverlle a autoestima aos veciños para recuperar o orgullo de sermos de Ourense».
Vivenda, obras e xogos
Alleos ao mitin central da campaña do BNG, os grandes partidos continuaron expondo os seus proxectos para o próximo mandato. O candidato do PSOE, Paco Rodríguez, lanzou as súas propostas para os máis novos, como a creación dunha liña de axudas para alugar vivendas. Manuel Cabezas, do PP, insistiu, pola súa banda, na idea de crear un novo acceso ao CHUO desde a N-525 ata a rotonda de Mariñamansa. E Agora (a coalición formada por Podemos, Ourense Mellor e outras formacións de esquerda) reuniuse con colectivos relacionados co mundo dos videoxogos, os xogos de mesa e os cómics para escoitar as súas propostas.
En toda a provincia
Por outra banda, o Partido Popular celebrou este luns o mitin central de Esgos no centro cultural Parada Justel. O candidato popular, Mario Rodríguez, incidiu na importancia da colaboración institucional para desenvolver proxectos estratéxicos e potenciar as políticas sociais. «Potenciaremos o servizo de axuda no fogar, a teleasistencia e as axudas de emerxencia municipal. Ademais, blindaremos as axudas á natalidade e á escolaridade, ademais das medidas de conciliación familiar», dixo.
Os socialistas celebraron mitin en Leiro. O candidato, Pedro José González, afirmou: «O Psoe aposta polo cambio e por unhas políticas municipais que beneficien a todos e non só a uns poucos e que poñan fina 30 anos de goberno do PP, nos que ou retroceso e ou declive foron a tónica xeral do municipio».
A xunta electoral deu a razón a VETA , o partido veciñal do concello de Taboadela , na denuncia que presentou polo acto celebrado o pasado 13 de maio. Refírese, en concreto, ao anuncio publicado polo alcalde socialista, Álvaro Vila, en relación á inauguración dunha estatua do escultor Xosé Cid na localidade a traves do Facebook do Concello.
En Larouco , o mitin da candidatura do PP contou coa presenza do presidente provincial do partido, José Manuel Baltar, e a conselleira de Política Social, Fabiola García. A cabeza de lista, Patricia Lamela, opta á reelección cun programa centrado no benestar dos veciños e a posta en valor da riqueza cultural e patrimonial do municipio. «Melloraremos a protección e axuda á familia, ampliando a oferta de vivenda social ademais de reforzar a atención aos nosos maiores», destacou Lamela. E avanzou: «traballaremos para mellorar os niveis de comodidade de todos os nosos veciños».
Recibe cada tarde no teu correo a newsletter Eleccións 28M co adianto en exclusiva da enquisa de Sondaxe para La Voz e o resumo diario da campaña en Galicia. Se aínda non es subscritor, subscríbeche por só 2€/meses.