Recollen máis de 300 firmas nun par de horas para reclamar un segundo pediatra no Barco
O Barco de Valdeorras
A campaña continuará ata o 1 de maio a través das ANPA e varios establecementos comerciais
24 abr 2024 . Actualizado ás 05:00 h.A recollida de firmas iniciada por un grupo de pais do Barco de Valdeorras para reclamar un segundo pediatra para o centro de saúde saldouse con máis de 300 rúbricas en apenas dúas horas. Foi o inicio dunha campaña que se manterá ata o 1 de maio e á que se sumaron as ANPA dos centros educativos así como varios establecementos. O obxectivo é levalas ao pleno do Barco para sumar o apoio da corporación o próximo mes e non descartan trasladalas ao Parlamento ou á Valedora do Pobo chegado o momento. Todo dependerá de se a situación se liquida ou non.
A recollida de firmas activouse tras confirmarse que a renuncia do pediatra que conseguiu a praza vacante no concurso de méritos. Desde o Sergas explican que se iniciará o proceso ofrecer esa praza e outras que quedaron libres aos médicos pediatras que non conseguiron unha na anterior convocatoria.
A situación de Xinzo chega ao Parlamento
Pola súa banda, o BNG anunciou que levará ao Parlamento a falta de especialistas no centro de saúde de Xinzo de Limia. Así se acordou na reunión mantida entre a deputada Sonia Vidal e o portavoz municipal, Camilo Vila. Tamén acudiu Manuel Pozo. Está prevista a presentación dunha pregunta parlamentaria así como unha proposición non de lei para urxir á Consellería de Sanidade a cubrir as vacantes.