A estación de montaña de Manzaneda pecha a tempada cun 18 % máis de facturación que o ano pasado
MANZANEDA
A programación estival comezará abril con 16 eventos confirmados
22 mares 2024 . Actualizado ás 10:55 h.Coincidindo coa entrada da primavera, a estación de montaña de Manzaneda dá tamén por concluída a súa tempada de inverno, que pecha cun incremento do 18% na facturación con respecto ao ano 2023. Nos últimos meses houbo un incremento notable de visitantes, especialmente desde Portugal, confirmando a recuperación dun mercado que historicamente foi maioritario na única estación de esquí de Galicia.
A tempada de verán comezará en abril e cun calendario que ten xa 16 eventos confirmados. Os primeiros, coa inscrición aberta, son o Trial Box, os días 6 e 7; o Rali Adventure 2024, o 9 e o 10, mentres que nas fins de semana do 21 e 29 acollerá novas edicións da Transgalaica e do Gran Fondo e Medio Fondo da Federación Galega de Ciclismo. Nos meses seguintes a oferta inclúe orientación, bicicleta, motos ou mesmo tenis. Haberá un campus deste deporte, para o que se están acondicionando as pistas. O culmen da programación será a etapa número 12 da Volta a España, o 29 de agosto, con saída desde a cidade de Ourense e chegada á estación de montaña.
Cinco mil reservas para campamentos
Doutra banda, a estación afronta o verán con 5.000 reservas xa formalizadas para os seus campamentos, tanto nenos como adolescentes. Igualmente, está a pór en marcha unha campaña de captación de grupos de excursionistas, de Galicia e de Portugal, con paquetes pechados para pasar a fin de semana con pensión completa e acceso aos diferentes servizos.
O rocódromo interior será a novidade da nova tempada.