A neve bloqueou a unha familia no seu coche a dous quilómetros da estación de montaña de Manzaneda
MANZANEDA
Normalidade nas estradas ourensás nunha xornada na que hai 14 pistas abertas ao esquí
24 feb 2024 . Actualizado ás 10:55 h.A nevada caída o venres provocou que unha familia queda bloqueada na estrada de acceso á estación de montaña de Manzaneda. Unha patrulla de motoristas da Garda Civil do Barco de Valdeorras auxilioulles para que puidesen chegar ao seu aloxamento a pé de pistas. Foi ao redor das oito da tarde, momento no que a estrada OU-704 presentaba nivel amarillio pola presenza de neve sobre o asfalto.
Ante a situación, desde a Garda Civil despregouse a varias patrullas nas estradas ourensás, con presenza na estrada OU-536 entre Ourense e A Pobra de Trives, a N-525 á altura de Ríos e na A-52 vixiouse especialmente o tramo entre A Gudiña e A Mezquita.
Esa foi a situación durante a noite. Na mañá deste sábado a situación nos viarios da provincia é de normalidade total grazas ao traballo dos quitaneves. Hai moito tráfico nas estradas de acceso á estación de montaña, que hoxe reabriu as súas portas. A neve caída de noite e o traballo dos operarios e dos canóns de innivación permitiu ampliar a previsión inicial de abrir dúas pistas ao esquí a que sexan 14 as dispoñibles para a práctica deportiva. En total son 11,75 quilómetros. Advirten desde a xerencia, en todo caso, que o telesilla pode ter paradas intermitentes ao longo do día debido aos refachos de vento.