Os servizos sociais seleccionarán aos candidatos a recibir o servizo
07 feb 2024 . Actualizado ás 05:00 h.O Concello de Larouco incorporarase en breve ao programa Xantar na casa que presta o Consorcio Galego de Servizos de Igualdade e Benestar. O seu xerente, Perfecto Rodríguez, mantivo unha reunión coa alaldesa do municipio, Patricia Lamelas, para analizar o proceso que axudará a mellorar a asistencia aos maiores do municipio. Tras a firma do convenio de adhesión, agora é a quenda dos servizos sociais do Concello que se ocuparán de seleccionar aos posibles beneficiarios. Mercé ao acordo, a Xunta asume o financiamento do a metade do custo da comida e o resto repártese entre os usuarios e a propia entidade muninipal. O programa facilita que os usuarios teñan un menú semanal nos seus domicilios. Inicialmente serán dez as persoas atendidas, pero a cifra irase ampliando segundo vaia sendo necesario. «O obxectivo é garantir que calquera maior que viva só, persoa dependente ou que está en risco de exclusión social, reciba na súa vivenda unha comida san e adaptada ás súas necesidades», apuntou Perfecto Rodríguez.
A comida repártese aos domicilios dos usuarios unha vez por semana con todos os menús, incluídos os de sábados, domingos e festivos, e o usuario só ten que quentalo. En caso de non dispor de microondas ou neveira, electrodomésticos necesarios para esa tarefa e para a conservación dos alimentos, tamén se lle facilitan.