Escolares de Celanova melloran en atención e rendemento co programa Móvete 15
CELANOVA
O plan de quince minutos diarios de exercicio entre clases matinais subiu un 10 % as cualificacións
13 jun 2017 . Actualizado ás 05:00 h.O rendemento escolar dos alumnos do CEIP de Celanova mellorou coa implantación do proxecto Móvete 15, unha iniciativa pioneira en España que comezou a principio de curso no colexio celanovés e que incluía quince minutos de exercicio libre despois da primeira hora de clase, cando se imparten as materias máis fortes. O rendemento académico mellorou un dez por cento entre a primeira e a segunda avaliación, apuntaba o director do centro, Juanjo Lamelas. Falta coñecer os resultados completos do curso, coa incorporación de datos da terceira avaliación, pero no centro educativo están satisfeitos e contentos con este programa.
Quen expuxo pólo en marcha foi o xefe de estudos e profesor de Educación Física, Óscar Rodríguez, despois de coñecer o programa dun colexio escocés denominado The Daily Mile (a milla diaria). En Celanova, comezaron en outubro co plan. Ás 11.10 horas, cada día, todo o colexio saía ao patio a exercitarse -ben andando, correndo, saltando ou bailando-, en definitiva, a moverse durante quince minutos sen pausa.
Óscar Rodríguez aprecia que o exercicio matinal entre clases mellorou sensiblemente a atención dos alumnos en xeral. Os profesores do centro coincidiron en considerar que esta saída favorece a concentración dos estudantes para continuar a actividade lectiva. O programa inseriuse, explicou o xefe de estudos, entre as dúas primeiras horas de cada xornada escolar, cando se imparten as materias que poden resultar máis duras, como as linguas ou as matemáticas.
Outro dos obxectivos do proxecto, e así naceu orixinalmente no colexio St. Ninians, de Stirling (Escocia), era loitar contra a obesidade infantil. No caso ourensán, buscábase sobre todo incorporar o exercicio á actividade diaria dos nenos e previr o sedentarismo. A finais da semana pasada, estiveron no colexio -como cada final de curso- os avaliadores do servizo da mancomunidade que pasan a medir e pesar a cada alumno ao principio e ao final de todos os cursos, para informar de se a evolución física dos nenos está a ser correcta. Estes datos tomáronse a semana pasada e poderanse comprobar cos do principio de curso para ver se, tamén fisicamente, nótase o efecto do programa Móvete 15.
No CEIP de Celanova, explica o director, o exercicio hase feito variado, para que non se convertese en algo aburrido. Ás veces, en lugar de facer as voltas no interior do patio, saían ao exterior ou á carballeira que hai na parte posterior do colexio. O importante era moverse, con catro circuítos diferentes deseñados polos profesores de Educación Física. E facíano todos os alumnos, incluídos os de educación infantil, para habituar aos nenos desde os tres anos.
Datos solicitados para unha tese universitaria sobre rendemento
O programa Móvete 15 do centro celanovés tamén suscitou a atención dos investigadores universitarios. Un alumno sevillano que está realizando unha tese sobre rendemento escolar e exercicio solicitou os datos ao colexio de Celanova para incorporalos aos seus estudo sobre o tema. Envíanselle sen referencias persoais do alumnado, sen nomes que poidan identificalos, os resultados académicos e proximamente tamén as avaliacións físicas de principio e final de curso. No colexio están satisfeitos co programa e decididos a continuar o ano que vén con el, visto que deu bo resultado en todos os aspectos, axudando a alumnos e profesores a ter na xornada diaria unha paréntese de movemento que anima a todos.