A deputada Noa Presas denunciou que os ríos da provincia de Ourense están xa sobreexplotados
10 sep 2023 . Actualizado ás 05:00 h.Un macroproxecto hidroeléctrico que afectaría aos municipios de Castrelo de Miño, A Arnoia e Cartelle está en proceso. A iniciativa atópase neste momento na fase de consultas previas para a súa tramitación ante o Ministerio para a Transición Ecolóxica e o Reto Demográfico (Miteco).
Contra esta iniciativa posicionouse este sábado o BNG nun acto desenvolvido en Castrelo de Miño no que participaron a deputada autonómica Noa Presas, concelleiros da comarca de O Ribeiro e veciños da zona. A representante nacionalista no Parlamento de Galicia informou sobre as características e o impacto do proxecto e anunciou a presentación de iniciativas sociais e institucionais para evitar a construción desta macrocentral hidroeléctrica de 260 MW.
Presas sinalou que« os ríos ourensáns están xa sobreexplotados e non podemos repetir os erros do século XX con novos prexuízos económicos, medioambientais e sociais para lucrar ás grandes eléctricas mentres Ourense se empobrece», ao tempo que lembrou que «esta provincia ten no seu territorio o 50 % da gran hidráulica, os nosos ríos están hiperexplotados e aínda así iso só serve para lucrar as eléctricas mentres nós temos os peores datos galegos de empobrecemento, avellentamento e emigración». Desde el BNG se recordó que «cos últimos datos, no 2022 Galiza exportou o 40,5 % da electricidade xerada. Ademais, do total producido, o 64,8 % foi renovable, cumprimos os obxectivos da UE para 2030 e temos dereito a facer unha planificación ordenada».
Noa Presas anunciou que o Bloque levará aos concellos, Deputación, Parlamento de Galicia e Congreso dos Deputados iniciativas para que o Ministerio desbote avanzar neste proxecto.