Karlotta deixou ventos de 170 quilómetros por hora en Carballeda de Valdeorras

A borrasca Karlotta deixouse notar no oriente ourensán e en xeral en toda a provincia. A alerta amarela por fortes ventos na montaña traduciuse en máximos. Na estación de Lardeira, en Carballeda de Valdeorras, ás dez da mañá sopraba cunha forza de 170 quilómetros por hora, só superado polos 200 rexistrados no concello lucense de Lugo. Sen saír do mesmo municipio, en Casaio houbo refachos de 121 quilómetros por hora; mentres que na Veiga dous das súas estacións coáronse entre as cinco con maior actividade de Galicia: Xares con 131,5 e Serra do Eixe con 127 quilómetros por hora.

Foi unha xornada de moito vento que se traduciu en árbores caídas. Á primeira hora da mañá, un gran exemplar derrubouse nunha leira privada no Barco de Valdeorras, caendo á rúa. Cortou por completo a rúa Pescadores, unha das que sobe do Malecón á travesía. O exemplar foi cortado polos traballadores do GES do Barco mentres a Policía Local se encargaba de desviar o tráfico. Tamén sufriron danos varias árbores do xardín da Casa Grande de Viloira.

Tamén caeron varias árbores en Castro Caldelas, onde a alcaldesa, Sara Inés Vega , pediu aos veciños que non saísen das súas casas se non era necesario. Ademais, insistiu en reclamar que se evitasen os desprazamentos en coche mentres estea vixente a alerta.

Fixo moito vento e regresou o frío tras varias xornadas con temperaturas máis propias da primavera que de febreiro. Os termómetros derrubáronse ata o punto de que na cabeza de Manzaneda se rexistraron cero graos.

---

---

---