A Audiencia ordena seguir investigando o atropelo mortal da avenida de Zamora
OURENSE
O xuíz de instrución arquivara o caso ao non apreciar relevancia penal
08 may 2024 . Actualizado á 05:00 h.A Audiencia Provincial de Ourense ordena continuar a instrución para determinar se houbo algunha imprudencia que poida ter encaixe penal por parte do camioneiro que atropelou a un peón na rotonda da avenida de Zamora de Ourense. O accidente ocorreu o 29 de marzo do 2023 e o home atropelado morreu un mes despois no hospital.
A familia do falecido denunciou e o Xulgado de Instrución número 1 de Ourense despachou o caso cun sobresemento provisional das actuacións, por considerar que carecían de relevancia penal. O mesmo xulgado desestimou o recurso de reforma que presentou o avogado do denunciante contra ese arquivo, pero a Audiencia dá a razón a esta parte e estima o seu recurso de apelación e ordena ao xulgado que continúe a investigación.
A sala do tribunal de apelación disiente do instrutor. «Non cabe neste momento procesual degradar os feitos investigados a un simple ilícito civil, pois se precisamente, como vén recoñecer o denunciado, a presenza dun autobús alí estacionado reducía a visibilidade, debería incorporarse sen risco para os usuarios da vía», expón a maxistrada da Audiencia.
Aínda que no seu primeiro auto de arquivo o instrutor sinalaba que o peón pasaba por un lugar indebido, no recurso de reforma corrixía esta apreciación e afirmaba que si camiñaba por un lugar habilitado.
A Audiencia recolle que o xuíz ponderou para arquivar o caso que o condutor do camión tiña a visibilidade reducida pola presenza dun autobús, que desde a frontal do vehículo había unha zona morta dun metro e que o denunciado circulaba a menos de 30 km/hora. Con todo, o tribunal de segunda instancia reclama que se valore que o camión carecía de espellos específicos de ángulo morto frontal e que, segundo o atestado da Policía Local, non tiña prioridade de acceso á rotonda pois accedía a unha vía pavimentada desde outra que non o estaba, polo que, segundo o regulamento de circulación, sería o peón o que tería preferencia.
A Sección Segunda tamén esixe ao instrutor que se pronuncie sobre a fianza solicitada pola parte denunciante ao investigado e á entidade aseguradora, algo que o xuíz non considerara procedente. Así que as actuacións volven ao xulgado para que continúe a investigación. A Fiscalía e a parte denunciada opuxéranse ao recurso de reforma e o Ministerio Fiscal tamén impugnou o que chegou á Audiencia.
Achegados do falecido reclamaron recentemente, cunha concentración no aniversario da súa morte, xustiza e seguridade viaria na zona.