O equipo de Rubén Domínguez xoga esta tarde en Oira o derbi galego
02 mares 2024 . Actualizado ás 12:17 h.O Ourense Club de Fútbol camiña xornada a xornada cara a unha maior solidez futbolística. Xa se albiscaba desde o comezo da liga en Segunda Federación, pero co paso das xornadas hase ir confirmando. Os reforzos do mercado de inverno deron variantes, fortaleza e máis gol a un equipo que xa tiña boas hechuras. O liderado de grupo que acadou non parece que vaia a ser flor dun día, aínda que mantelo ata as xornadas decisivas e facerse coa propiedade numérica dun posto que conduce directamente ao ascenso, para por gañar indubitadamente duelos como o desta tarde en Oira (18.00 horas, TVG2). É un derbi entre dous equipos en traxectoria inversa. Os ourensáns levan nove xornadas consecutivas sen perder e os vilalbeses non gañan desde o ano pasado. O seu último triunfo remóntase á xornada quince e, aínda que empataron contra o Compos a semana pasada, o Racing Vilalbés está a caer na zona de perigo da clasificación.
O adestrador do Ourense CF, Rubén Domínguez, coñece esta situación e é consciente de que o rival desta tarde xógase a vida en Oira. Destaca deles o seu carácter defensivo e a súa calidade ao contragolpe. Para xogar as súas numerosas cartas, convoca a 22 xogadores nunha lista completa na que continúan a columna vertebral da tempada, xunto coas novas adquisicións como Moha, Dei Renzo ou Mangana.