Foron subvencionadas iniciativas de entidades deportivas e tamén municipais relativas a eventos de promoción da actividade física
13 dic 2023 . Actualizado ás 05:00 h.A xunta de goberno da Deputación de Ourense aprobou onte achegas económicas por un valor de 670.000 euros, destinadas a municipios, entidades e mancomunidades, para colaborar con actuacións concretas e tamén con gastos de funcionamento.
No ámbito deportivo, a axuda máis cuantiosa é a que recibirá o Club Deportivo Arenteiro. Un montante de 150.000 euros para melloras en vello estadio de Espiñedo. A entidade carballiñesa chegou a un acordo co consistorio local, co fin de facerse cargo do mantemento da instalación municipal.
Doutra parte, o Pavillón Ourense Club de Fútbol obterá 33.000 euros para sufragar gastos da súa actividade na presente tempada, mentres que a Federación Galega de Baloncesto disporá de 5.500 euros procedentes da institución autonómica, como colaboración na Xuntanza Preminibásket. Tamén foi subvencionado o Grupo Cuevas Nogueira Trail, con 4.000 euros pola organización do VII Trail Ribeira Sacra.
Con transfondo deportivo, tamén se aprobaron dúas axudas máis ao Concello de Piñor e ao de Cartelle. O primeiro recibirá un total de 14.000 euros pola organización do RallyMix ao que lle poñen nome, mentres que o segundo obtén 5.890 euros polo III Torneo Internacional de Fútbol sala Feminino.