O Ourense FS prosegue a pretemporada en Poio e o Cidade inicia a Copa Galicia
OURENSE
As de Primeira División non poderán contar aínda con Ju Delgado nin Chiky, que ultiman a súa preparación, nin con Zaide
02 sep 2023 . Actualizado ás 05:00 h.Os Remedios, A Seca e o Paco Chao serán os pavillóns onde rode esta tarde o balón para os equipos ourensáns de fútbol sala. Os femininos, despois do torneo internacional de Cartelle da pasada fin de semana, seguen a súa preparación. O Ourense Ontime —gañador en Outomuro tras superar ao Benfica e ao Futsi— cumpre un mes de pretemporada visitando ao Poio Pescamar (19.00 horas). Raquel Mondoruza está contenta coa adaptación das tres caras novas, co nivel físico que mostra o equipo e coa asimilación de conceptos. Ju Delgado e Chiky, en fase de recuperación —unha dunha lesión e outra dun tratamento estabilizador do xeonllo— e Zaide, cunha leve fisura nun dedo tras un pequeno accidente nun adestramento, son as únicas que non entran na convocatoria. O filial xoga un amigable (16.30) ante o River Zamora nos Remedios. No mesmo escenario, ás 19.00 horas, o novo e moi novo Cidade dás Burgas de Manolo Codeso buscará elevar o seu nivel competitivo no encontro da primeira fase da Copa Galicia, ante o Mosteiro Bembibre. No Paco Chao, derbi copeiro masculino entre o Carballiño e Sala Ourense desde as 19.30 horas.