A planta de Sogama en Verín tratará os residuos de 22 concellos para facer compost
OURENSE
A instalación producirá 1.500 toneladas ao ano de materia orgánica para o seu uso na agricultura e a xardinería
01 abr 2023 . Actualizado ás 05:00 h.A planta de biorresiduos de Verín , no parque empresarial de Pazos, entrará en funcionamento o 1 de xuño. Así o anunciaron este venres o presidente de Sogama , Javier Domínguez, e o delegado territorial da Xunta, Gabriel Alén, durante unha visita xunto a varios alcaldes da comarca. A instalación, cuxa construción corresponde á Conselleríade Medio Ambiente , é a única destas características da provincia.
A planta dará servizo a 22 concellos —48.000 habitantes— e os seus rexedores quixeron coñecer as súas características técnicas e a operativa para transformar os residuos orgánicos recolleitos nos colectores marróns nun compost de alta calidade. Os concellos adheridos son, ademais de Verín, Oímbra, Monterrei, Cualedro, Trasmiras, Laza, Castrelo do Val, Ríos, Vilardevós, Baltar, Os Blancos, Calvos de Randín, Porqueira, Xinzo de Limia, Vilar de Santos, Rairiz de Veiga, Sandías, Xunqueira de Ambía, Sarreaus, Vilar de Barrio, Vilariño de Conso, A Gudiña, A Mezquita e Viana do Bolo.
A planta, construída grazas a un investimento de algo máis de 5,5 millóns de euros, ocupa unha parcela de 12.000 metros cadrados e disporá de capacidade para tratar tres mil toneladas anuais de materia orgánica e 1.600 de estructurante. Estímase que produza 1.500 toneladas ao ano de compost, que se utilizará no sector da agricultura e a xardinería, en substitución dos fertilizantes artificiais.
A instalación estará equipada coas tecnoloxías máis innovadoras en depuración de augas e aire, así como na redución do nivel de ruídos, garantindo unha operativa respectuosa co medio ambiente. Ademais, será autosuficiente desde o punto de vista enerxético ao estar alimentada con fontes renovables.
Neste sentido, Gabriel Alén puxo en valor o traballo da Consellería de Medio Ambiente, Territorio e Vivenda e de Sogama para axudar a que antes do 31 de decembro deste ano os concellos, que son os que teñen as competencias en materia de xestión de residuos, poidan cumprir coa normativa ambiental europea. Unha vez que entre en funcionamento, a planta de Verín incorporarase á rede de infraestruturas deseñada pola Xunta, e executada por Sogama, para propiciar a valorización da materia orgánica en Galicia mediante a súa transformación en compost.
Actualmente, a rede estará conformada por catro plantas de biorresiduos, unha en cada provincia, e trece de transferencia que estarán preparadas para transvasar, ademais da bolsa amarela e negra, a materia orgánica contida nos residuos municipais —produción de biogás a partir da fracción orgánica de residuos sólidos urbanos— e a recollida a través do quinto colector de cor marrón.