O Mobile World Congress de Barcelona conclúe hoxe. A que compañas pertencían as dúas casetas máis grandes da feira? Seguro que non llo imaxinan. Nokia e Huawei. Nokia? Nin estaba morta, nin estaba de parranda. Desfíxose da súa división de móbiles no 2013; absorbeu a competidoras como a francesa Alcatel-Lucent e converteuse no terceiro maior fabricante de equipos de telecomunicacións do mundo, cuns ingresos anuais de 23.000 millóns de euros. Con máis de 100.000 empregados, é a terceira maior empresa de Finlandia tras o banco Nordea e a provedora estatal de electricidade Fortum. Por certo, Stephen Elop, o presidente canadense que traizoou a Nokia —foi o cabalo de Troia que vendeu os móbiles a Microsoft, que ao ano seguinte nomeouno vicepresidente—, non correu a mesma sorte: no 2015 despedírono do xigante de Redmond, no 2018 de Telstra (a maior operadora de Australia) e no 2021 relevárono como CEO de APiJET, unha firma de enxeñería aeronáutica.
Vaiamos con Huawei. No Mobile ocupaba practicamente o pavillón 1 enteiro, pero os seus dispositivos móbiles eran só unha pequena parte. Continúa lanzando smartphones e, a pesar de que non poden levar os servizos móbiles de Google, atópanse entre os teléfonos máis avanzados do mercado. A súa división de consumo centrouse en portátiles, computadores de escritorio como o novo MateStation X e wearables, que non sofren as restricións do veto norteamericano. Entón, para que tanto espazo en Barcelona? Pois para mostrar os últimos proxectos e solucións da compaña, que abarcan as redes móbiles xigabit, liñas rápidas na nube, redes de destino totalmente ópticas... As aplicacións son infinitas: lousas dixitais para a educación, ferramentas para o sector manufacturero, software e hardware para monitorizar o transporte ou xestionar centros de datos. E todo cun enfoque ecolóxico —a caseta imitaba un bosque dixital— co obxectivo de reducir o consumo de enerxía: «Máis bits, menos watts».
Nokia e Huawei, reinventarse para seguir adiante.