Os motores de 45 coches clásicos ruxirán no segundo Rali de Regularidade Vila de Sarria
SARRIA
O Club Clásicos de Sarria organiza este evento o día 4 de maio, coincidindo coa 27 Feira de Antigüidades. Queren que esta particular competición, co tempo, sexa recoñecida a nivel nacional
26 abr 2024 . Actualizado ás 05:00 h.Fai seis anos que tres amigos, apaixonados do motor e dos coches clásicos, decidiron fundar o Club Clásicos de Sarria . Unha agrupación que na actualidade conta con case 90 socios e que fai numerosos eventos na comarca. O 4 de maio, coincidindo coa 27 Feira de Antigüidades e Restauración San Lázaro, organizan o segundo Rali de Regularidade Vila de Sarria.
Desde o club promoven concentracións de vehículos clásicos no verán e un desfile de Nadal, que levan xa catro ou cinco anos organizando, ademais das saídas e actividades que fan entre os socios. Pero o Rali de Regularidade nace para dar cabida a outra modalidade: «Consiste en cumprir as medias de tempo establecidas pola organización a través dun percorrido marcado previamente. Cada piloto leva un copiloto e un libro de ruta e ten que intentar cumprir esas medias. Canto máis che aproximes aos tempos, máis opcións tes de gañar».
Desde o Club Clásicos buscan dar a coñecer o Rali entre a xente de Sarria , pero tamén de toda Galicia, de varios lugares de España e mesmo doutros países, como Francia e Portugal: «Queremos facer un pouco de nome e que sexa coñecido a nivel nacional». O ano pasado participaron 37 vehículos e este xa cubriron todas as inscricións, que son 45.
A combinación de varios eventos
Contan que este ano decidiron facelo coincidir coa Feira de Antigüidades para poder facer así un evento máis grande e acadar un maior éxito: «Consideramos que é boa idea enchelo con máis actividades. A xente que veña pode participar no Rali de Regularidade, pero tamén visitar unha feira de antigüidades e ver a carreira de obstáculos, coñecida como Pretorian». Engaden que «merece a pena porque é difícil atopar outro evento con estas características».
Paixón polos coches
O Club Clásicos de Sarria nace para compartir coñecementos, restaurar vehículos clásicos e dar a coñecer este mundo porque «hai moita xente que non tiña ningún coche deste estilo e acabou comprando». Ademais, contan que é unha forma de dar a coñecer vehículos doutras persoas que os tiña gardados sen sacalos nin ensinalos.