O alcalde independente do Páramo, José Luis López, será o candidato do PP
O Páramo
A formación xurdida no 2019 intégrase cos populares para as próximas eleccións
15 feb 2023 . Actualizado ás 13:48 h.O PP anunciou finalmente este mércores que a formación Todo polo Páramo integrarase no partido. Xa que logo, o actual alcalde José Luis López, será o candidato popular de cara ás próximas eleccións. O municipio do Páramo pertence ao partido xudicial de Lugo, polo que os votos poderían ser decisivos para o PP na Deputación.
O partido independente Todo polo Páramo estreouse nas últimas eleccións e conseguiu a alcaldía case por maioría absoluta. Un grupo de traballadores crearan a formación ante a situación de parálise que vivía o concello desde facía 36 anos, segundo denunciaron no seu momento, co mesmo alcalde do PP. A cabeza de partido foi José Luis López, traballador dunha empresa colaboradora con telefónica e expresidente do equipo de fútbol do municipio.
Todo polo Páramo non conseguiu a maioría, aínda que quedou a só 60 votos, e pactou co PSOE. Catro anos despois, a formación intégrase no PP. Actualmente os populares contan con tres concelleiros, Verónica Arias, a presidenta local do partido; María Isabel López e Cristian Rodríguez. Todos se mostraron de acordo coa integración e manteñen ata o final do mandato as súas actas como concelleiras.
José Luis López será o candidato do PP para as próximas eleccións de maio. Aínda falta por coñecer quen serán os que complementen a lista. Actualmente os edís de todo polo Páramo son Santiago Fernández, Benjamín García e Ana Castaño. Os populares fanse así cun alcalde máis que podería ser decisivo para a Deputación, xa que O Páramo pertence ao partido xudicial de Lugo.
