Despois de ser clave no mandato de Lara Méndez, traballará agora co popular José Manuel Rey Varela
26 feb 2024 . Actualizado ás 19:30 h.O interventor municipal de Lugo, Manuel Vázquez Fernández, deixa o Concello lucense para traballar no de Ferrol. Tras solicitar o seu traslado a Ferrol, notificará oficialmente estes días que abandona a cidade de Lugo.
Vázquez foi clave durante o mandato da exalcaldesa Lara Méndez, e chegou a ser case a súa man dereita, con máis influencia mesmo que os secretarios. Con este cambio, pasará a traballar co alcalde popular José Manuel Rey Varela.
Manuel Vázquez levaba desde febreiro do 2019 como interventor do Concello de Lugo, onde tamén foi coordinador de Alcaldía e Urbanismo, gañando responsabilidades e intervindo en asuntos que levaban tempo bloqueados, como a aprobación do 5 % do PXOM.
O PP teme que se poidan chegar a bloquear os servizos municipais
Para os populares resulta «chocante» que en dous meses se haxan ir os dous funcionarios de maior cargo do Concello, como son o interventor e o secretario. Primeiro, o viceportavoz do PP, Quique Rozas, pregunta que pasa no goberno local para que haxa unha fuxida de altos cargos: «A marcha da alcaldesa foi a punta de iceberg dunha cascada de dimisións xa que en dousmeses abandonaron o Concello dous funcionarios de alta dirección do organigrama municipal».
Rozas cre que a deriva do goberno e a falta de persoal cualificado pode chegar a bloquear algúns servizos, provocando caos e inestabilidade na xestión municipal. «Está dificultando o funcionamiento eficaz do Concello e, en consecuencia, a prestación de servizos axeitados aos cidadáns» resaltou.
As vacantes de altos cargos, defende o PP, podería relacionarse coas ordes do Concello que enviou recentemente o concelleiro Pablo Permuy a través dunha circular na que indicaba aos responsables das áreas que non deben asignar nin realizar funcións doutra categoría. Fíxoo para evitar sentenciar xudiciais favorables a traballadores que reclamaban compensacións salariais. «Non todas as áreas teñen persoal suficiente, polo que se cada funcionario fai estritamente o que lle corresponde hai algúns servizos que quedan descubertos», aclarou Rozas.
Por iso, o PP pide ao Concello que dote a todos os departamentos co persoal suficiente. Concretamente a marcha do interventor consideran que agravará está situación porque «non é unha praza apetecible dada a desorganización, os contratos caducados; proxectos faraónicos difíciles de manter, xestión moi deficiente e as disputas internas entre os socios do goberno, que complican o día a día do funcionariado».
VARIAS VACANTES DE XEFES DE SERVIZOS
Os populares lembraron que son varias as prazas vacantes no Concello. A praza de vicesecretaría está cuberta de forma provisional por un técnico de administración xeral que non está habilitado, como a xefatura de Arquitectura. Tamén a praza de xefatura de Licenzas e Contratación está vacante.
«A estas prazas poden optar funcionarios doutras administracións pero tampouco as piden, o Concello ten que explicar que pasa para que isto suceda», expuxo Rozas.