Marta López foi despedida no 2019 tras 20 anos nese posto. O Concello alegaba que «incumpría as funcións do seu cargo», pero tres xulgados distintos déronlle a razón á funcionaria
20 novs 2023 . Actualizado ás 23:06 h.Marta López, a que fose xefa da sección de Persoal do Concello de Lugo entre os anos 1997 e 2019, poderá recuperar o seu posto. O Tribunal Superior de Xustiza de Galicia anunciou esta semana a inadmisión a trámite do recurso interposto polo Concello, parte demandada, que se negaba a readmitir á funcionaria nesa praza tras apartala fai case un lustro. Con esta decisión son xa tres os xulgados que lle deron a razón á ex xefa de Persoal e rexeitaron a tese do Concello, que terá que readmitila no caso de que ela o solicite.
No 2019, o Concello decidiu apartar a Marta López do seu posto, alegando que «a xestión en materia de persoal foi inexistente, ou, aínda peor, desenvolta de xeito descabelado, aleatorio e as máis das veces inxustificado». A funcionaria reclamou xudicialmente pouco despois. No 2021, o Xulgado do Contencioso-Administrativo número 1 de Lugo deulle a razón. O Concello recorreu ao Tribunal Superior de Xustiza de Galicia (TSXG), que fallou no mesmo sentido. Agora, catro anos despois, o Tribunal Superior, a través da sección de casación autonómica, ha inadmitido o último recurso que podía pór o ente municipal, polo que pecha a causa dándolle a razón á funcionaria.
No seu auto, asinado o pasado 16 de novembro, os maxistrados apoian a sentenza do xulgado lucense, que explicaba que «non resultou acreditado co grao de certeza exixible que a recorrente incumprise as obrigacións derivadas do seu cargo, e en concreto que teña deixado de ter a capacidade necesaria por ter incumprido de forma manifestamente deficiente, ineficaz, descoidada ou neglixente as obrigacións que lle incumbían».
O Superior non ve razóns para desdicir ás dúas primeiras instancias
O TSJ agora falla no mesmo sentido, explicando que non existen motivos para desdicir as dúas primeiras sentenzas que daban a razón á funcionaria. A súa xustificación reside en que, tanto no documento do xulgado de Lugo como o do TSXG, «non se deduce que o motivo de anulación da resolución administrativa en primeira instancia e de confirmación en segunda instancia da devandita sentenza descanse nunha asimilación entre un procedemento de remoción de posto de traballo e un procedemento sancionador ou disciplinario, senón na constatación de que, aínda que non se trate de procedemento disciplinario, a normativa si esixe unha motivación á decisión de remoción, e o que se fai é analizar a concreta fundamentación de a resolución recorrida».
É dicir, que o feito de apartar á funcionaria non estivo ben fundamentado por parte do Concello de Lugo, xa que, aínda que non fose un despedimento disciplinario, a normativa esixe unha xustificación sólida para apartar a un funcionario por oposición dunha praza deste tipo.
Un cesamento e unha polémica rolda de prensa
Marta López foi cesada do seu posto por acordo da xunta de goberno do 13 de novembro do 2019. Aquel acordo foi exposto nunha rolda de prensa pola tenente de alcalde e edila de Gobernanza, Paula Alvarellos, quen explicou que a decisión se sustentaba en varios informes emitidos por Intervención, polo Secretario municipal e polo órgano asesor da xunta de goberno.
Neles concluíase que «a xestión en materia de persoal foi inexistente, ou, aínda peor, desenvolta de xeito descabelado, aleatorio e as máis das veces inxustificado». Os informes sinalaban que a súa xestión, nalgúns casos, era inexistente, polo que Alvarellos xustificou o seu cesamento porque o seu proceder podía situar ao Concello ante unha situación que lle xerase prexuízo.
Agora, o Concello non ten a potestade de presentar máis recursos. Marta López, polo tanto, podería recuperar o seu posto de xefa de Persoal se así o desexa. Existe a posibilidade, ademais, de renunciar ao seu regreso por iniciativa propia, e buscar un acordo monetario co Concello.